گھر میں گھس کر پٹائی ، ویسٹ انڈیز نے بھارتی کرکٹ ٹیم کے ارمانوں پر پانی پھیر دیا

ویسٹ انڈیز نے چوتھے ٹی 20 میچ میں بھارت کو 24 رنز سے شکست دے کر پانچ میچوں کی سیریز 2-2 سے برابر کردی۔ حیدرآباد میں کھیلے گئے مقابلے میں ویسٹ انڈیز نے پہلے بیٹنگ کرتے ہوئے 3 وکٹوں پر 247 رنز بنائے۔ جواب میں بھارتی ٹیم 19.3 اوورز میں 223 رنز بنا کر آؤٹ ہوگئی۔

شے ہوپ کی سنچری

ویسٹ انڈیز نے بھارت کی دعوت پر پہلے بیٹنگ کی اور بڑا مجموعہ اسکور بورڈ پر سجایا۔ کپتان شے ہوپ نے شاندار بیٹنگ کرتے ہوئے 102 رنز کی ناقابلِ شکست اننگز کھیلی۔

شرفین ردرفورڈ نے بھی ذمہ دارانہ بیٹنگ کا مظاہرہ کیا اور 49 رنز بنا کر ناٹ آؤٹ رہے۔ دونوں بلے بازوں نے اننگز کے اختتامی مرحلے میں ٹیم کا مجموعہ 247 رنز تک پہنچانے میں اہم کردار ادا کیا۔

 یہ بھی پڑھیں :’سری لنکا کے خلاف طوفانی اننگز‘، ویسٹ انڈیز کے سابق کرکٹر ایان بشپ نے معاذ صداقت کے بارے بڑی بات کہہ دی

شمرون ہیٹمائر نے 33 رنز بنائے جبکہ روومن پاول 24 رنز بنا کر آؤٹ ہوئے۔ جیول اینڈریو نے 21 رنز کی اننگز کھیلی۔

بھارت کی جانب سے پرنس یادو، اکشر پٹیل اور ارشدیپ سنگھ نے ایک ایک وکٹ حاصل کی۔ تاہم بھارتی بولرز ویسٹ انڈیز کی بیٹنگ کو بڑے اسکور تک پہنچنے سے نہ روک سکے۔

بھارت کی بیٹنگ ناکام

248 رنز کے ہدف کے تعاقب میں بھارتی ٹیم نے جارحانہ انداز اپنایا، لیکن وقفے وقفے سے وکٹیں گرنے کے باعث مطلوبہ رفتار برقرار نہ رکھ سکی۔ پوری ٹیم 19.3 اوورز میں 223 رنز بنا کر پویلین لوٹ گئی۔

سنجو سیمسن نے 56 رنز بنا کر بھارتی اننگز میں سب سے نمایاں کارکردگی دکھائی۔ تلک ورما نے 43 رنز بنائے جبکہ نتیش کمار ریڈی 41 رنز کے ساتھ نمایاں رہے۔

ابھیشک شرما نے 29 رنز اسکور کیے جبکہ کپتان شریاس ایر 16 رنز بنا سکے۔ ایشان کشن صرف 6 رنز بنا کر آؤٹ ہوئے۔

ارشدیپ سنگھ 5 رنز پر ریٹائرڈ ہرٹ ہوئے۔ اکشر پٹیل نے 3 رنز بنائے جبکہ نمن دھیر اور پرنس یادو کھاتہ کھولنے میں ناکام رہے۔

کیمو پال کی تباہ کن بولنگ

ویسٹ انڈیز کی جانب سے کیمو پال نے بھارتی بیٹنگ لائن کو مشکلات سے دوچار کرتے ہوئے 5 وکٹیں حاصل کیں۔ ان کی عمدہ بولنگ نے میچ کا رخ مہمان ٹیم کے حق میں موڑنے میں اہم کردار ادا کیا۔

گداکیش موتی نے 2 کھلاڑیوں کو آؤٹ کیا جبکہ شیمر اسپرنگر اور روماریو شیفرڈ نے ایک ایک وکٹ حاصل کی۔

 یہ بھی پڑھیں ؛پاکستان نے دوسرے ٹیسٹ میں ویسٹ انڈیز کو 8 وکٹوں سے شکست دیدی

ویسٹ انڈیز کے بولرز نے بڑے ہدف کے باوجود بھارتی بلے بازوں کو کھل کر کھیلنے کا موقع نہیں دیا۔ اہم مواقع پر وکٹیں حاصل کرکے مہمان ٹیم نے مقابلے پر اپنی گرفت مضبوط رکھی۔

فیصلہ کن میچ 17 اکتوبر کو

چوتھے میچ میں کامیابی کے بعد ٹی 20 سیریز 2-2 سے برابر ہوگئی ہے۔ اب دونوں ٹیموں کے درمیان سیریز کا پانچواں اور فیصلہ کن مقابلہ 17 اکتوبر کو بینگلورو میں کھیلا جائے گا۔

ویسٹ انڈیز نے بڑے اسکور اور مؤثر بولنگ کی بدولت سیریز میں واپسی کی ہے۔ دوسری جانب بھارت کو فیصلہ کن میچ میں سیریز اپنے نام کرنے کے لیے بیٹنگ اور بولنگ دونوں شعبوں میں بہتر کارکردگی دکھانا ہوگی۔