سربراہ پاک بحریہ ایڈمرل نوید اشرف نے کہا ہے کہ پاک بحریہ نے تمام آپریشنل شعبوں میں اپنی جنگی صلاحیتوں کو غیر معمولی حد تک بڑھا لیا ہے اور مسلح افواج کسی بھی جارحیت کا منہ توڑ جواب دینے کی بھرپور صلاحیت رکھتی ہیں۔
جمعرات کو خیبر پختونخوا کے ضلع نوشہرہ میں واقع پاکستان ایئر فورس اکیڈمی اصغر خان رسالپور میں پاسنگ آؤٹ پریڈ سے خطاب کرتے ہوئے نیول چیف نے کہا کہ پاک بحریہ اپنے بحری بیڑے کو جدید خطوط پر استوار کرنے کی جانب تیزی سے گامزن ہے۔
ایڈمرل نوید اشرف نے واضح کیا کہ جدید ترین جنگی جہازوں، ہنگور کلاس آبدوزوں، مقامی طور پر تیار کردہ طویل فاصلے تک مار کرنے والے ہتھیاروں اور بغیر پائلٹ کے نظام کی شمولیت سمیت پاکستان میری ٹائم سائنس اینڈ ٹیکنالوجی پارک کا قیام اہم سنگِ میل ہیں۔
انہوں نے کہا کہ بحریہ کی جنگی صلاحیتوں میں عصری اور مستقبل کی جنگی ضروریات کے عین مطابق انقلابی تبدیلیاں لائی گئی ہیں۔
واضح رہے کہ پاک بحریہ کے بیڑے میں مجموعی طور پر 8 ہنگور کلاس آبدوزیں شامل کی جا رہی ہیں۔ اس سلسلے کی پہلی آبدوز رواں سال جون میں کراچی پورٹ پہنچی تھی جس نے ستمبر میں بحیرہ عرب میں پہلی بار براہِ راست ہتھیار فائر کرنے کا کامیاب مظاہرہ کیا۔
The graduation parade is underway at the Pakistan Air Force Academy Asghar Khan in Risalpur, marking the successful completion of training by graduating cadets.
دفاعی خود انحصاری کے اس سفر میں رواں سال اپریل کے وسط میں مقامی سطح پر تیار کردہ اینٹی شپ بیلسٹک میزائل کا کامیاب تجربہ کیا گیا، جبکہ چند روز بعد مقامی اینٹی شپ ویپن سسٹم ’تیمور‘ کو بھی کامیابی سے آزمایا گیا۔
اس سے قبل گزشتہ برس نومبر میں بھی بحری جہاز سے داغے جانے والے مقامی اینٹی شپ بیلسٹک میزائل کا کامیاب تجربہ کیا جا چکا ہے۔
جدید جنگی تقاضے اور ٹیکنالوجی کا کردار
پریڈ سے خطاب کرتے ہوئے نیول چیف نے نشاندہی کی کہ جدید جنگ کی نوعیت ڈرامائی طور پر تبدیل ہو چکی ہے اور اس میں غیر معمولی تیزی سے ارتقاء ہو رہا ہے۔ ان کا کہنا تھا کہ اس تبدیلی کے پیچھے نئی ٹیکنالوجیز کا ظہور کارفرما ہے، جس نے جنگی تصورات، نظریات اور تنظیمی ڈھانچے میں انقلابی تبدیلیاں برپا کر دی ہیں۔
انہوں نے کہا کہ اب جنگیں محض روایتی میدانوں تک محدود نہیں رہیں بلکہ الیکٹرانک وارفیئر، سائبر، خلائی اور ادراکی (کاگنیٹو) شعبوں تک پھیل چکی ہیں۔ خودکار نظام، مصنوعی ذہانت اور انفارمیشن وارفیئر نے جنگیں لڑنے اور جیتنے کے انداز کو یکسر بدل کر رکھ دیا ہے۔
علاقائی سلامتی کے چیلنجز اور آپریشن محافظ البحر
ایڈمرل نوید اشرف نے کہا کہ عالمی اور علاقائی تزویراتی ماحول انتہائی پیچیدہ ہو چکا ہے، بالخصوص مشرقِ وسطیٰ میں بڑھتی ہوئی کشیدگی نے صورتحال کو مزید حساس بنا دیا ہے۔
تیزی سے بدلتے ہوئے جغرافیائی و سیاسی حالات کثیر الجہتی سیکیورٹی چیلنجز کو جنم دے رہے ہیں، جو روایتی خطرات کے ساتھ ساتھ ہائبرڈ اور غیر متناسب خطرات سے نمٹنے کے لیے مسلسل چوکسی، تزویراتی بصیرت اور غیر معمولی آپریشنل تیاری کا تقاضا کرتے ہیں۔
انہوں نے اس عزم کا اعادہ کیا کہ مسلح افواج ان تمام حالات سے پوری طرح باخبر ہیں اور اسی کے مطابق اپنی تیاریاں مکمل کر رکھی ہیں۔ نیول چیف نے بتایا کہ مشرقِ وسطیٰ کے تنازع کے آغاز پر رواں سال مارچ میں شروع کیا گیا ’آپریشن محافظ البحر‘ تاحال کامیابی کے ساتھ جاری ہے۔
معرکۂ حق اور پاک فضائیہ و بحریہ کا مثالی اشتراک
مئی 2025 کی پاک بھارت کشیدگی کا حوالہ دیتے ہوئے ایڈمرل اشرف نے کہا کہ مسلح افواج ناقابلِ تسخیر ہیں اور کسی بھی جارحیت کو روکنے کی مکمل اہلیت رکھتی ہیں۔
یاد رہے کہ پاک فوج نے 22 اپریل کے پہلگام واقعے سے لے کر 10 مئی کو آپریشن ’بنیان مرصوص‘ کے اختتام تک بھارت کے ساتھ ہونے والے اس تنازع کو ’معرکۂ حق‘ کا نام دیا تھا۔
نیول چیف نے دوٹوک الفاظ میں کہا کہ ’مجھے یقین ہے کہ ہمارے دشمن نے سبق سیکھ لیا ہے اور اسے دوسرے سبق کی ضرورت نہیں پڑے گی‘۔
انہوں نے معرکۂ حق میں پاک فضائیہ کی غیر معمولی کارکردگی کو سراہتے ہوئے کہا کہ جنگی تاریخ میں پہلی بار پاک فضائیہ نے کثیر الجہتی آپریشنز کیے جن میں بنیادی طور پر مقامی صلاحیتیں اور دیسی ’کل چین‘ استعمال کی گئی، جو گزشتہ چند برسوں کی جدت پسندی اور خود انحصاری کی دانشمندانہ حکمت عملی کا نتیجہ ہے۔
بحری محاذ کا ذکر کرتے ہوئے انہوں نے بتایا کہ اس تنازع کے دوران پاک بحریہ نے بھارتی بحریہ کو سمندر میں کسی بھی قسم کی جارحیت سے کامیابی کے ساتھ باز رکھا اور دشمن پورے معرکے میں پسپا رہا۔
ایڈمرل اشرف نے فضائیہ اور بحریہ کو ’برادرانِ اسلحہ‘ قرار دیتے ہوئے کہا کہ سمندری حدود ہمارا مشترکہ آپریشنل میدان ہے، جہاں ہم مل کر مشقیں کرتے ہیں اور مادرِ وطن کے دفاع کے لیے شانہ بشانہ لڑیں گے۔
خطے میں امن کی خواہش اور پاک ترکیہ دوستی
سربراہ پاک بحریہ نے کہا کہ پاکستان ایک امن پسند ملک ہے جو ہمیشہ تحمل، مذاکرات، سفارت کاری، علاقائی استحکام اور عالمی امن کو ترجیح دیتا ہے۔ تاہم انہوں نے واضح کیا کہ ہم اپنے وطن کا دفاع کرنا بخوبی جانتے ہیں اور امن کے قیام کے لیے ملک و قوم اور مسلح افواج نے بے مثال قربانیاں دی ہیں۔
پریڈ میں ترک فضائیہ کے سربراہ جنرل رفت دالکیران کی شرکت کا خیرمقدم کرتے ہوئے ایڈمرل نوید اشرف نے کہا کہ ہمیں ترکیہ کے ساتھ اپنی آزمودہ دوستی پر فخر ہے، دونوں برادر ممالک ہر کٹھن اور خوشی کے موقع پر ہمیشہ ایک دوسرے کے شانہ بشانہ کھڑے رہے ہیں۔
دفاعی حلقوں کے نزدیک رسل پور کی اس تقریب میں نیول چیف کا خطاب خطے کی بدلتی ہوئی سیکیورٹی صورتحال میں ایک واضح اور دوٹوک تزویراتی پیغام ہے۔
ایک جانب ہنگور کلاس آبدوزوں اور مقامی بیلسٹک میزائلوں کی شمولیت بحرِ ہند میں طاقت کے توازن کو مستحکم کر رہی ہے، تو دوسری جانب معرکۂ حق کے حوالے سے ان کا بیان اس حقیقت کی عکاسی کرتا ہے کہ پاکستان کی بری، بحری اور فضائی افواج کے درمیان مشترکہ آپریشنل ہم آہنگی اب ایک فیصلہ کن مرحلے میں داخل ہو چکی ہے۔
مشرقِ وسطیٰ کی کشیدگی کے دوران ’آپریشن محافظ البحر‘ کا تسلسل اس امر کا ثبوت ہے کہ پاک بحریہ نہ صرف ملکی ساحلوں بلکہ بین الاقوامی سمندری گزرگاہوں کے تحفظ میں بھی ایک کلیدی کردار ادا کر رہی ہے۔