بالائی علاقوں میں کل سے برف باری کا نیا اسپیل,نئی ایڈوائزری جاری

محکمہ موسمیات نے ملک بھر میں موسم سے متعلق نئی ایڈوائزری جاری کر دی ہے جس کے مطابق ملک کے بالائی علاقوں خصوصاً مری، گلیات، خیبر پختونخوا اور بلوچستان میں کل سے برف باری کا نیا اسپیل شروع ہونے کا امکان ہے۔

ایڈوائزری کے مطابق سرد ہواؤں کا طاقتور نظام شمالی اور مغربی علاقوں میں داخل ہوگا جس کے باعث خیبر پختونخوا اور بلوچستان کے مختلف علاقوں میں برف باری متوقع ہے، جبکہ درجہ حرارت میں اچانک کمی کے باعث ملک کے بعض میدانی اور زیریں علاقوں میں بارش کے ساتھ ژالہ باری بھی ہو سکتی ہے۔

مزید پڑھیں:سال نو پر مری میں برفباری، سیاحوں کی غیر معمولی تعداد کو داخلی راستوں پر روک دیا گیا

محکمہ موسمیات نے خبردار کیا ہے کہ میدانی علاقوں میں رات کے اوقات کے دوران شدید سردی پڑنے کا امکان ہے۔ اس صورتحال کے پیش نظر

مسافروں اور کسانوں کو ہدایت کی گئی ہے کہ وہ موسم کی صورتحال کو مدنظر رکھتے ہوئے اپنے سفری اور زرعی امور کی منصوبہ بندی کریں۔

دوسری جانب مقامی انتظامیہ اور دیگر متعلقہ اداروں نے بھی شہریوں کو خبردار کیا ہے کہ بالائی علاقوں میں شدید برف باری کے باعث معمولات زندگی بری طرح متاثر ہو رہے ہیں، لہٰذا ان علاقوں کا سفر کرنے سے قبل متعلقہ اداروں کی جاری کردہ ایڈوائزریز پر ضرور عمل کیا جائے۔

واضح رہے کہ گزشتہ چند دنوں کے دوران تفریح کی غرض سے مری، گلیات اور گرد و نواح کے علاقوں میں آنے والے سیاحوں کی تعداد میں غیر معمولی اضافہ ہوا، جس کے باعث انتظامی امور میں شدید مشکلات کا سامنا کرنا پڑا۔ شدید ٹریفک جام کے باعث ہزاروں گاڑیاں برف میں پھنس گئیں

ٹریفک پولیس اور انتظامی اداروں کی جانب سے دن کے مختلف اوقات میں مری، گلیات، نتھیا گلی اور دیگر حساس علاقوں میں عوام کے داخلے پر پابندیاں بھی عائد کی گئیں، جس کے نتیجے میں ہزاروں گاڑیوں کو داخلی راستوں سے ہی واپس لوٹنا پڑا۔

انتظامیہ نے شہریوں سے اپیل کی ہے کہ غیر ضروری سفر سے گریز کریں اور اپنی اور دوسروں کی سلامتی کو یقینی بنائیں۔