اسحاق ڈار اور مصر کے وزیر خارجہ بدر عبدالعاطی کے درمیان ٹیلیفونک رابطہ

نائب وزیراعظم اور وزیر خارجہ اسحاق ڈار اور مصر کے وزیر خارجہ بدر عبدالعاطی کے درمیان ٹیلیفونک رابطہ ہوا جس میں خطے کی مجموعی صورتحال اور تازہ علاقائی پیش رفت پر تفصیلی تبادلہ خیال کیا گیا، دونوں رہنماؤں نے موجودہ حالات کے تناظر میں خطے میں امن، استحکام اور باہمی تعاون کی اہمیت پر زور دیا۔

گفتگو کے دوران دونوں وزرائے خارجہ نے اس بات پر اتفاق کیا کہ خطے میں بڑھتی ہوئی پیچیدگیوں اور مختلف چیلنجز کے پیش نظر قریبی سفارتی روابط کو مزید مضبوط بنانا ناگزیر ہے۔

انہوں نے اس امر پر بھی زور دیا کہ امن و استحکام کے لیے مشترکہ اور مربوط کوششیں وقت کی اہم ضرورت ہیں تاکہ کسی بھی ممکنہ کشیدگی کو بڑھنے سے روکا جا سکے۔

اسحاق ڈار نے گفتگو میں پاکستان کے مؤقف کو اجاگر کرتے ہوئے کہا کہ پاکستان خطے میں پرامن بقائے باہمی اور سفارتی حل کی پالیسی پر یقین رکھتا ہے۔انہوں نے اس عزم کا اظہار کیا کہ پاکستان تمام دوست ممالک کے ساتھ مل کر خطے میں امن کے فروغ کے لیے اپنا کردار جاری رکھے گا۔

یہ بھی پڑھیں :اسحاق ڈار اور مارکو روبیو کی اہم ملاقات، پاک امریکا تعاون بڑھانے پر اتفاق

مصری وزیر خارجہ بدر عبدالعاطی نے بھی خطے کی صورتحال پر تشویش کا اظہار کیا اور کہا کہ علاقائی امن کے لیے تمام ممالک کو ذمہ دارانہ کردار ادا کرنا ہوگا۔انہوں نے پاکستان اور مصر کے درمیان موجود دوستانہ تعلقات کو سراہتے ہوئے اس بات پر زور دیا کہ دونوں ممالک کو مختلف سطحوں پر تعاون اور رابطے کو مزید فروغ دینا چاہیے۔

دونوں رہنماؤں نے اس بات پر بھی اتفاق کیا کہ موجودہ عالمی اور علاقائی حالات کے پیش نظر مسلسل رابطہ اور مشاورت ضروری ہے تاکہ مشترکہ چیلنجز کا مؤثر طور پر مقابلہ کیا جا سکے۔

انہوں نے دوطرفہ تعلقات کو مزید مستحکم بنانے اور مختلف شعبوں میں تعاون بڑھانے کے عزم کا اعادہ کیا،ٹیلیفونک گفتگو کے اختتام پر دونوں وزرائے خارجہ نے اس بات پر زور دیا کہ پاکستان اور مصر خطے میں امن، ترقی اور استحکام کے لیے آئندہ بھی قریبی رابطے اور تعاون کا سلسلہ جاری رکھیں گے۔