بند شاہراہیں کھلوانے پر کالعدم ایکشن کمیٹی کی طرف سے فائرنگ کی گئی،ترجمان آزاد کشمیر حکومت

ترجمان آزاد کشمیر حکومت چوہدری گفتار حسین اور ڈی آئی جی عرفان مسعود کشفی نے پریس کانفرنس کرتے ہوئے کہاہے کہ ریاست مخالف سرگرمیوں کے باعث کالعدم ایکشن کمیٹی کو کالعدم قراردیا گیا،کالعدم ایکشن کمیٹی کے رویے پر تحمل کا مظاہرہ کیا گیا،حکومت نے ہمیشہ مذاکرات اور عوامی مسائل کے حل کو ترجیح دی ۔

حکومت پاکستان نے ہمیشہ مفاہمت سے عوامی مسائل حل کرنے کو ترجیح دی،جب تک کالعدم جوائنٹ ایکشن کمیٹی نے عوامی حقوق کی بات کی حکومت نے اس کی حمایت کی۔

انہوں نے کہا کہ ریاست مخالف بیانیہ سامنے آنے پر عوامی ایکشن کمیٹی کو کالعدم قرار دیا ،کالعدم ایکشن کمیٹی پاکستان اور آزادکشمیر کیخلاف بیرونی سازش کا حصہ بنی تو کارروائی کی گئی۔

بند شاہراہیں کھلوانے پر کالعدم ایکشن کمیٹی کی طرف سے فائرنگ کی گئی، خواتین ،بچوں کو ڈھال کے طور پر استعما ل کیا جارہا ہے ،راولا کوٹ اور ملحقہ علاقوں میں سڑکوں کو بلا ک کیا گیا۔

ترجمان آزاد حکومت ریاست جموں و کشمیر نے کہا کہ گزشتہ36 روز سے جاری دھرنے کے باعث پونچھ ڈویژن میں خوراک، ادویات اور ضروری اشیاء کی ترسیل شدید متاثر ہوئی جبکہ شاہراہوں اور رابطہ سڑکوں پر رکاوٹیں کھڑی کر کے عام شہریوں کی آمدورفت مکمل طور پر معطل کی گئی، جس کے نتیجے میں کئی علاقوں میں غذائی قلت اور اشیائے ضروریہ کی کمی کی صورتحال پیدا ہوگئی۔

یہ بھی پڑھیں :کالعدم ایکشن کمیٹی نے ایک ماہ میں ریاست کو 15 ارب کا نقصان پہنچایا، سیکرٹری اطلاعات آزاد کشمیر

ترجمان آزاد جموں و کشمیر پولیس نے کہا کہ حکومت کی آئینی اور اخلاقی ذمہ داری ہے کہ عوام کے لیے بند راستے بحال کیے جائیں، تاہم بند شاہراہیں کھلوانے کی ہر کوشش کے دوران کالعدم کمیٹی کی جانب سے مزاحمت اور فائرنگ کا سامنا کرنا پڑا۔

شجاع آباد میں راستہ بحال کرنے والی ٹیم پر ملحقہ علاقوں اور جنگلات سے شدید فائرنگ کی گئی جس سے قانون نافذ کرنے والے اداروں کے اہلکار زخمی ہوئے، جبکہ ارجہ جھنڈالہ میں بند راستہ کھولنے کے دوران ڈوزر پر فائرنگ سے ڈوزر آپریٹر زخمی ہوا اور زخمی ڈوزر آپریٹر کو منتقل کرتے وقت سیکیورٹی فورسز پر بھی فائرنگ کی گئی۔

انہوں نے کہا کہ کالعدم عوامی ایکشن کمیٹی کے شر پسندوں کی جانب سے اشیائے خوردونوش لے جانے والے ٹرکوں پر حملے، لوٹ مار اور ڈیزل نکالنے کے واقعات کسی پرامن احتجاج کی عکاسی نہیں کرتے۔

ترجمان آزاد حکومت ریاست جموں و کشمیر نے کہا کہ کالعدم عوامی ایکشن کمیٹی کی جانب سےخواتین اور بچوں کو قانون نافذ کرنے والے اداروں کے سامنے انسانی ڈھال کے طور پر استعمال کرنے، انہیں ان کی مرضی کے خلاف دھرنے میں رکھنے اور ان کے ہاتھوں میں قرآنِ مجید اور سفید جھنڈے دے کر آگے لانے کی منصوبہ بندی کی اطلاعات موصول ہوئی ہیں، جو قابل مذمت ہے ،قرآنِ مجید کو کسی بھی تصادم یا محاذ آرائی میں استعمال کرنا مذہبی تقدس اور اسلامی تعلیمات کے منافی ہے۔جس کی بالکل اجازت نہیں دی جائے گی ۔

انہوں نے کہا کہ اشتعال انگیزی، سرکاری املاک کو نقصان پہنچانا اور قانون نافذ کرنے والے اداروں پر حملے ناقابلِ قبول ہیں۔ انہوں نے کہا کہ کالعدم ایکشن کمیٹی نے 13جولائی کے احتجاج میں طلبہ و طالبات کو اسکول اور کالج کے یونیفارم میں شرکت کی اپیل کی ہے جبکہ 15 جولائی کے لانگ مارچ میں طلبہ کو یونیفارم میں مظفرآباد کی جانب پیش قدمی کرتے ہوئے فرنٹ لائن پر کھڑا کرنے کی منصوبہ بندی کی گئی ہے۔

یہ بھی پڑھیں :آخر بلی تھیلے سے باہرآہی گئی،کالعدم ایکشن کمیٹی کے شرپسند امان نے احتجاج ناکام ہونے پر بھارت سے مدد مانگ لی

انہوں نے کہا کہ کسی بھی ناخوشگوار واقعے کی صورت میں تمام تر ذمہ داری کالعدم عوامی ایکشن کمیٹی پر عائد ہوگی انہوں نے کہا کہ قانون کی عملداری یقینی بنانا اور معصوم شہریوں کو ریلیف فراہم کرنا حکومت کی آئینی ذمہ داری ہے۔ آزاد جموں و کشمیر قانون ساز اسمبلی کے عام انتخابات مقررہ انتخابی شیڈول کے مطابق ہی منعقد ہوں گے اور انتخابات کے شیڈول میں کسی قسم کی تبدیلی یا تاخیر کا کوئی امکان نہیں۔

آزاد، منصفانہ، شفاف اور پُرامن انتخابات کے لیے تمام انتظامی اور سیکیورٹی تیاریاں مکمل ہیں،ترجمان آزاد حکومت ریاست جموں و کشمیر اور ترجمان آزاد جموں و کشمیر پولیس نے عوام سے اپیل کی کہ وہ جمہوری عمل پر اعتماد کا اظہار کرتے ہوئے ذمہ داری کے ساتھ اپنا حقِ رائے دہی استعمال کریں، اشتعال انگیز پروپیگنڈے، افواہوں اور تفرقہ انگیز بیانیے کو مسترد کریں، کیونکہ ریاست کا امن، استحکام اور قانون کی بالادستی ہر شہری کی مشترکہ ذمہ داری ہے۔

انہوں نے کہا کہ آزاد کشمیر کے پُرامن تشخص کو نقصان پہنچانے والی گمراہ کن مہمات سے ہوشیار رہنے کی ضرورت ہے اور حکومت و ریاستی ادارے ہر قیمت پر امن، قانون کی حکمرانی اور عوامی مفاد کا تحفظ یقینی بنائیں گے۔