By حجاز مقدس میں مکہ سے مدینہ جانے والے پاکستانی عمرہ زائرین کا ٹریفک حادثہ پیش آ گیا، جس کے نتیجے میں پنجاب کے شہر عارف والا سے تعلق رکھنے والے باپ اور دو بیٹے جاں بحق ہو گئے۔
سعودی میڈیا سے موصول ہونے والی اطلاعات کے مطابق حجاز مقدس سے ایک انتہائی افسوسناک خبر سامنے آئی ہے جہاں مکہ مکرمہ سے مدینہ منورہ کی طرف جانے والے پاکستانی عمرہ زائرین ایک شدید ٹریفک حادثے کا شکار ہو گئے۔
یہ بھی پڑھیں:عمرہ ویزے پر سعودی عرب جانے والے پاکستانیوں کے ساتھ کیا ہوا؟ بڑی خبر آ گئی
اس دلخراش حادثے کے نتیجے میں ایک ہی خاندان کے 3 افراد، جن میں ایک والد اور ان کے 2 بیٹے شامل ہیں، موقع پر ہی جاں بحق ہو گئے۔
میڈیا رپورٹس کے مطابق حادثے میں جاں بحق ہونے والے تینوں افراد کا تعلق پاکستان کے صوبہ پنجاب کے شہر عارف والا سے تھا۔ جاں بحق ہونے والوں میں ایک بیٹا ڈاکٹر اور دوسرا انجنیئر تھا، شناخت چوہدری واحد علی (والد)، عمر واحد (بیٹا) اور علی واحد (بیٹا) شامل ہیں۔
عارف والا کے محلہ اقبال نگر میں سوگ کی فضا
تمام مرحومین کا تعلق عارف والا کے علاقے محلہ اقبال نگر سے بتایا گیا ہے۔ اس اچانک اور صدمہ ناک سانحے کی اطلاع ملتے ہی آبائی علاقے عارف والا اور محلہ اقبال نگر میں کہرام مچ گیا ہے اور اہل خانہ سمیت پورے علاقے میں شدید سوگ کی فضا چھائی ہوئی ہے۔
میڈیا رپورٹس کے مطابق حادثے کی حتمی جگہ اور اس کی وجوہات سے متعلق تفصیلی معلومات تاحال دستیاب نہیں ہو سکیں، تاہم متعلقہ حکام صورتحال کا جائزہ لے رہے ہیں۔
لاکھوں کی تعداد میں پاکستانی ہر سال سعادتِ حج اور عمرہ کی ادائیگی کے لیے خادمِ الحرمین الشریفین کی سرزمین کا رخ کرتے ہیں۔
مکہ مکرمہ اور مدینہ منورہ کے درمیان طویل سفر کے دوران زائرین کی سہولت کے لیے ٹرانسپورٹ کے بہترین ذرائع موجود ہیں، تاہم بعض اوقات دورانِ سفر پیش آنے والے ناگزیر ٹریفک حادثات اس نوعیت کے المناک جانی نقصان کا باعث بن جاتے ہیں جو پورے ملک کو سوگوار کر دیتے ہیں۔
مزید پڑھیں:حج و عمرہ زائرین کیلئے ڈیجیٹل ویکسینیشن کارڈ، ایئرلائنز آپریٹرز کمیٹی کا اہم مطالبہ
دیارِ غیر میں اس نوعیت کے حادثات تارکین وطن اور زائرین کو درپیش غیر یقینی خطرات کی عکاسی کرتے ہیں۔ جب کسی گھر کے سرپرست اور 2 جوان بیٹے ایک ساتھ اس دنیا سے رخصت ہو جائیں، تو یہ متعلقہ خاندان کے لیے ایک ایسا ناقابلِ تلافی نقصان ہوتا ہے جس کا مداوا ناممکن ہے۔
