سعودی سفیر نواف المالکی کی وفاقی وزرا اور سینیٹرز سے اہم ملاقاتیں، باہمی دلچسپی کے امور پر تبادلہ خیال

پاکستان میں تعینات سعودی عرب کے سفیر نواف المالکی سے وفاقی حکومت کے اہم وزرا اور سینیٹرز نے الگ الگ ملاقاتیں کیں، جن میں خوش گوار اور دوستانہ ماحول میں دوطرفہ تعلقات، باہمی دلچسپی کے امور اور تعاون کو مزید فروغ دینے پر تبادلہ خیال کیا گیا۔

تفصیلات کے مطابق سعودی سفیر نواف المالکی سے وفاقی وزیر مصدق ملک نے ملاقات کی۔ ملاقات کے دوران دونوں رہنماؤں کے درمیان خوش گوار گفتگو ہوئی اور پاکستان اور سعودی عرب کے درمیان موجودہ تعلقات سمیت مختلف باہمی دلچسپی کے امور پر بات چیت کی گئی۔ فریقین نے دونوں ممالک کے مابین تعاون کو مزید مستحکم بنانے کے عزم کا اظہار کیا۔

اسی سلسلے میں سعودی سفیر نواف المالکی سے وفاقی وزیر شیزہ فاطمہ نے بھی ملاقات کی۔ اس موقع پر سعودی سفیر نے وفاقی وزیر کا پرتپاک استقبال کیا۔ ملاقات دوستانہ ماحول میں ہوئی، جس دوران مختلف شعبوں میں باہمی تعاون اور مشترکہ مفادات سے متعلق امور پر تبادلہ خیال کیا گیا۔

یہ بھی پڑھیں: سعودی عرب، 10 ہزار سے زائد غیر قانونی تارکین وطن ملک بدر

علاوہ ازیں سینیٹر محمد طلحہ محمود نے بھی سعودی سفیر نواف المالکی سے ملاقات کی۔ اس ملاقات میں بھی خوش گوار گفتگو کے ساتھ ساتھ دوطرفہ تعلقات اور باہمی دلچسپی کے مختلف امور زیر بحث آئے۔ دونوں رہنماؤں نے پاکستان اور سعودی عرب کے دیرینہ برادرانہ تعلقات کو مزید مضبوط بنانے کی ضرورت پر زور دیا۔

ملاقاتوں کے دوران اس بات پر اتفاق کیا گیا کہ پاکستان اور سعودی عرب کے درمیان دوستانہ اور برادرانہ روابط دونوں ممالک کے عوام کے لیے فائدہ مند ہیں اور مستقبل میں مختلف شعبوں میں تعاون کو مزید وسعت دی جائے گی۔