وزیراعلیٰ سہیل آفریدی کی نااہلی کے لئے دائر درخواست پر علی امین گنڈاپور کا ردعمل سامنے آگیا

سابق وزیراعلیٰ خیبرپختونخوا علی امین گنڈاپور نے وفاقی آئینی عدالت میں دائر درخواست پر وضاحت جاری کردی ہے۔

سماجی رابطے کی ویب سائٹ ایکس پر اپنے بیان میں علی امین گنڈاپور نے کہا کہ انہوں نے اپنے لیڈر عمران خان کے حکم پر بلاتاخیر وزارتِ اعلیٰ سے استعفے کی ہدایات پر عمل درآمد کروا کر اپنا فرض ادا کیا۔

علی امین گنڈاپور کا کہنا تھا کہ کسی بھی طرح کے کیس یا عدالتی کارروائی کے ساتھ نہ ان کا کوئی تعلق ہے اور نہ ہی ان کا کوئی عمل دخل ہے۔

“میں نے اپنے لیڈر عمران خان کے حکم کے مطابق بلا کسی تاخیر کے اپنی وزارتِ اعلیٰ کے استعفے کی ہدایات پر عمل درامد کروا کر اپنا فرض ادا کیا.
کسی بھی طرح کے کیس یا عدالتی کاروائی کے ساتھ نہ میرا تعلق ہے اور نہ میرا کوئی عمل دخل ہے”
علی امین خان گنڈاپور pic.twitter.com/S8GEDpqQYF

— Ali Amin Khan Gandapur (@AliAminKhanPTI) May 21, 2026

یاد رہے کہ وفاقی آئینی عدالت میں سابق وزیر اعلی علی امین گنڈاپور کی بطور وزیراعلیٰ بحالی کیلئے درخواست دائر کر دی گئی ہے جس کے بعد خیبرپختونخوا کی سیاسی صورتحال ایک بار پھر زیرِ بحث آ گئی ہے۔

یہ بھی پڑھیں: میڈیا کو دھمکانے سے نااہلی اور بدعنوانی نہیں چھپائی جا سکتی: عطا تارڑ کا سہیل آفریدی کی آڈیو پر رد عمل

درخواست شیر افضل مروت کی جانب سے دائر کی گئی ہے جس میں مؤقف اختیار کیا گیا ہے کہ علی امین گنڈاپور کا استعفیٰ غیر آئینی اور مبینہ طور پر دباؤ کے تحت لیا گیا اس لیے اسے کالعدم قرار دیا جائے۔

درخواست میں کہا گیا ہے کہ استعفیٰ کے عمل میں آئینی تقاضوں کو نظرانداز کیا گیا لہٰذا اسے قانونی طور پر غیر مؤثر قرار دیتے ہوئے علی امین گنڈاپور کو بطور وزیراعلیٰ بحال کیا جائے۔

قانونی ماہرین کے مطابق اس نوعیت کی درخواستیں عموماً آئینی تشریح اور استعفیٰ کے قانونی طریقہ کار سے متعلق اہم سوالات اٹھاتی ہیں جن پر عدالت آئین اور شواہد کی روشنی میں فیصلہ کرتی ہے۔