مری جانے والے سیاحوں اور مقامی شہریوں کے لیے اہم اطلاع سامنے آ گئی ہے۔ سٹی ٹریفک پولیس مری نے سڑک کی مرمت اور بحالی کے کام کے باعث مری راولپنڈی کشمیر روڈ کا ایک اہم حصہ پانچ روز کے لیے ہر قسم کی ٹریفک کے لیے بند کرنے کا اعلان کر دیا ہے۔
ٹریفک پولیس کی جانب سے جاری کردہ ٹریفک الرٹ کے مطابق بانسرا گلی سے بروری ٹک تک سڑک کا حصہ 15 جولائی کی رات 12 بجے سے 20 جولائی 2026 تک مکمل طور پر بند رہے گا۔ اس دوران چھوٹی اور بڑی تمام گاڑیوں کی آمدورفت معطل رہے گی تاکہ تعمیراتی کام محفوظ اور بروقت مکمل کیا جا سکے۔
پولیس حکام کے مطابق بندش کے دوران ٹریفک کو متبادل راستوں پر منتقل کیا جائے گا تاکہ مسافروں کو کم سے کم مشکلات کا سامنا کرنا پڑے۔ سیاحوں اور دیگر مسافروں کو ہدایت کی گئی ہے کہ وہ اپنے سفر کے لیے مری ایکسپریس وے کو متبادل روٹ کے طور پر استعمال کریں۔
ٹریفک پولیس نے مزید کہا ہے کہ مختلف مقامات پر ٹریفک وارڈنز تعینات کیے جائیں گے جو مسافروں کی رہنمائی کریں گے اور ٹریفک کی روانی برقرار رکھنے کے لیے ضروری اقدامات کریں گے۔ شہریوں سے درخواست کی گئی ہے کہ وہ دورانِ سفر وارڈنز کی ہدایات پر مکمل عمل کریں اور غیر ضروری رش سے گریز کریں۔
انتظامیہ نے سیاحوں اور مقامی رہائشیوں کو مشورہ دیا ہے کہ وہ اپنی سفری منصوبہ بندی پہلے سے کر لیں تاکہ بند سڑک کے باعث کسی قسم کی پریشانی یا تاخیر کا سامنا نہ کرنا پڑے۔
کسی بھی ہنگامی صورتحال ٹریفک اپ ڈیٹ یا رہنمائی کے لیے شہری مری ٹریفک کنٹرول روم کے فون نمبر 051-9269200 پر رابطہ کر سکتے ہیں۔
واضح رہے کہ موسمِ گرما کی تعطیلات کے باعث ان دنوں مری میں سیاحوں کی بڑی تعداد موجود ہے اس لیے ٹریفک پولیس نے مسافروں سے اپیل کی ہے کہ وہ متبادل راستے اختیار کریں صبر و تحمل کا مظاہرہ کریں اور انتظامیہ کے ساتھ تعاون کریں تاکہ سڑک کی مرمت کا کام مقررہ وقت میں مکمل کیا جا سکے۔
By 
