حج 2027 کے لیے پرائیویٹ حج اسکیم میں کتنی نشستیں باقی ہیں؟ تفصیلات سامنے آگئیں

 حج 2027 کے لیے پرائیویٹ حج اسکیم میں اب بھی بڑی تعداد میں نشستیں دستیاب ہیں۔ وزارت مذہبی امور کے مطابق نجی حج اسکیم کے تحت 50 ہزار نشستیں تاحال باقی ہیں۔

وزارت مذہبی امور کے مانیٹرنگ سیکشن کی جانب سے جاری کردہ نوٹس کے بعد پرائیویٹ حج کی بکنگ میں اضافہ ہوا ہے اور پاک حج ایپ کے ذریعے موصول ہونے والی درخواستوں کی تعداد 21 ہزار 547 تک پہنچ گئی ہے۔

بکنگ کے عمل میں تیزی

وزارت مذہبی امور کے مطابق پرائیویٹ حج اسکیم میں عازمین کی جانب سے درخواستیں جمع کرانے کا سلسلہ جاری ہے۔ حکام نے عازمین کو ہدایت کی ہے کہ حج سے متعلق مالی معاملات میں مقررہ طریقہ کار اختیار کیا جائے تاکہ ادائیگیوں کے دوران کسی قسم کی دشواری یا شکایت کا سامنا نہ کرنا پڑے۔

 یہ بھی پڑھیں :سرکاری حج سکیم کے تحت واجبات کی آخری قسط کی وصولی کا آغاز

وزارت نے واضح کیا ہے کہ پرائیویٹ اسکیم کے عازمین اپنے حج پیکج کے واجبات پاک حج ایپ کے ذریعے مکمل کریں۔ کسی فرد، ایجنٹ یا کمپنی کو براہ راست رقم دینے سے گریز کرنے کی ہدایت کی گئی ہے۔

18 ارب روپے منتقل

وزارت مذہبی امور کے ترجمان کے مطابق حج پورٹل کے ذریعے مجاز حج کمپنیوں کے اکاؤنٹس میں تقریباً 18 ارب روپے منتقل کیے جاچکے ہیں۔

ترجمان کے مطابق موصول ہونے والی رقوم میں سے تقریباً 45 فیصد ادائیگیاں ڈیجیٹل ذرائع کے ذریعے کی گئیں جبکہ باقی 55 فیصد رقم مینول بینک چالان کے ذریعے جمع کرائی گئی۔

25 مجاز کمپنیوں کے پیکیجز دستیاب

وزارت مذہبی امور نے بتایا ہے کہ حج پورٹل پر 25 مجاز کمپنیوں کے دو ہزار سے زائد حج پیکیجز دستیاب ہیں۔ عازمین اپنی ضروریات اور بجٹ کے مطابق دستیاب پیکیجز کی تفصیلات دیکھ سکتے ہیں اور مقررہ طریقہ کار کے تحت بکنگ مکمل کرسکتے ہیں۔

 یہ بھی پڑھیں :سرکاری حج سکیم کے تحت حج ویزے لگانے کا عمل شروع کردیا گیا

حکام کی جانب سے عازمین کو مشورہ دیا گیا ہے کہ وہ حج پیکیج حاصل کرنے سے قبل کمپنی کی مجاز حیثیت اور پورٹل پر موجود معلومات کی جانچ ضرور کریں تاکہ غیرمجاز افراد یا اداروں کے ذریعے مالی نقصان سے بچا جا سکے۔

آخری تاریخ 20 نومبر مقرر

وزارت مذہبی امور کے مطابق پرائیویٹ حج اسکیم میں حج پورٹل کے ذریعے داخلے اور بکنگ کے عمل کی آخری تاریخ 20 نومبر مقرر کی گئی ہے۔ عازمین کو ہدایت کی گئی ہے کہ وہ آخری تاریخ کا انتظار کرنے کے بجائے مقررہ وقت کے اندر اپنی بکنگ اور ادائیگی کا عمل مکمل کرلیں۔

شکایات کیلئے بھی سہولت

وزارت مذہبی امور نے پرائیویٹ حج اسکیم کے عازمین کے لیے شکایات درج کرانے کا طریقہ کار بھی واضح کردیا ہے۔ ترجمان کے مطابق اگر کسی عازم کو بکنگ، ادائیگی، کمپنی یا حج پیکیج سے متعلق کوئی مسئلہ پیش آتا ہے تو وہ حج پورٹل پر موجود انکوائری آپشن کے ذریعے اپنی شکایت یا مسئلے کی رپورٹ کرسکتا ہے۔

وزارت کے مطابق پرائیویٹ حج اسکیم میں نشستوں کی دستیابی کے باعث عازمین مقررہ مدت کے دوران مجاز کمپنیوں کے دستیاب پیکیجز سے استفادہ کرسکتے ہیں۔ تاہم بکنگ اور ادائیگی کے تمام مراحل مقررہ سرکاری نظام کے تحت مکمل کرنے پر زور دیا گیا ہے۔