پیٹرول اور ڈیزل سستا کرنے کا معاملہ، وزیراعظم اور امیر جماعت اسلامی کے درمیان آج مذاکرات ہوں گے

وزیراعظم شہباز شریف اور امیر جماعت اسلامی حافظ نعیم الرحمان کے درمیان آج ملاقات ہوگی، جس میں پیٹرولیم لیوی کے خاتمے اور پٹرول و ڈیزل کی قیمتوں میں کمی کے معاملے پر تبادلہ خیال کیا جائے گا۔

ملاقات دوپہر کو وفود کی سطح پر ہوگی۔ حکومتی وفد میں وفاقی وزیر منصوبہ بندی احسن اقبال، رانا ثناءاللہ اور وفاقی وزیر پٹرولیم علی پرویز ملک شامل ہوں گے۔

ملاقات کے لیے حکومت اور جماعت اسلامی کے درمیان اعلیٰ سطح پر رابطے کیے گئے ہیں۔ گزشتہ روز وفاقی وزیر منصوبہ بندی احسن اقبال نے جماعت اسلامی کے نائب امیر لیاقت بلوچ سے رابطہ کرکے وزیراعظم شہباز شریف اور حافظ نعیم الرحمان کی مجوزہ ملاقات کے حوالے سے تبادلہ خیال کیا تھا۔

یہ بھی پڑھیں:خیبر پختونخوا میں تبدیلی کے ثمرات آنے لگے، کرک میں تجاوزات کے خلاف بڑا آپریشن، سڑکیں کھل گئیں، شہریوں نے سکھ کا سانس لیا،تاجر تنظمیں بھی خوش

لیاقت بلوچ نے کہا تھا کہ حافظ نعیم الرحمان وزیراعظم سے پیٹرولیم لیوی کے خاتمے کے ایجنڈے پر ملاقات کریں گے۔ جماعت اسلامی کا مطالبہ ہے کہ پیٹرولیم لیوی ختم کرکے عوام کو پٹرول اور ڈیزل کی قیمتوں میں ریلیف دیا جائے۔

ملاقات میں پیٹرولیم مصنوعات کی قیمتوں اور لیوی سے متعلق جماعت اسلامی کے مطالبات پر گفتگو ہوگی۔