خیبرپختونخوا میں گورنر فیصل کریم کنڈی کے اختیارات بڑھانے کا فیصلہ، وفاقی حکومت کا نیا آرڈیننس لانے کا فیصلہ

خیبرپختونخوا میں امن و امان کی صورتحال بہتر بنانے اور انتظامی معاملات کو مزید مؤثر بنانے کے لیے وفاقی حکومت نے گورنر فیصل کریم کنڈی کے اختیارات میں اضافے کا فیصلہ کر لیا ہے، جس کے تحت نیا آرڈیننس جاری کرنے کی تیاری مکمل کی جا رہی ہے۔

  ذرائع کے مطابق وزیراعظم شہباز شریف نے ایمرجنسی کی صورتحال میں گورنر کو حاصل اختیارات میں اضافے سے متعلق مجوزہ آرڈیننس صدر مملکت آصف علی زرداری کو بھجوا دیا ہے۔ امکان ہے کہ وزیراعظم کی ایڈوائس پر صدر مملکت جلد اس آرڈیننس کی منظوری دیتے ہوئے اس کا اجرا کر دیں گے۔

مجوزہ آرڈیننس کے تحت خیبرپختونخوا میں ایمرجنسی کے نفاذ کی صورت میں گورنر کو پہلے سے زیادہ انتظامی اور قانونی اختیارات حاصل ہوں گے، جس سے صوبے میں ہنگامی حالات سے نمٹنے کے لیے گورنر کا کردار مزید مؤثر ہو سکے گا۔

12 خصوصی اضلاع میں بھی گورنر کا کردار بڑھانے کی تیاری

مجوزہ قانونی اقدام کا ایک اہم پہلو خیبرپختونخوا کے 12 خصوصی اضلاع سے متعلق ہے، جہاں گورنر فیصل کریم کنڈی کے انتظامی اختیارات میں اضافے کی تجویز شامل کی گئی ہے۔ اس اقدام کے ذریعے ان اضلاع میں انتظامی معاملات اور امن و امان سے متعلق حکومتی اقدامات میں گورنر کے کردار کو وسعت دی جائے گی۔

آرڈیننس کے اجرا کے لیے قومی اسمبلی اجلاس کا شیڈول تبدیل

حکومتی ذرائع کے مطابق مجوزہ آرڈیننس کے اجرا کے معاملے نے قومی اسمبلی کے اجلاس کے شیڈول کو بھی متاثر کیا ہے۔ قومی اسمبلی کا اجلاس طلب کیے جانے کے بعد آرڈیننس جاری کرنے میں قانونی رکاوٹ پیش آ سکتی ہے، اسی وجہ سے اجلاس دوبارہ شیڈول کیا گیا ہے تاکہ مجوزہ قانونی اقدام کا عمل مکمل کیا جا سکے۔

وفاقی حکومت کے اس فیصلے کو خیبرپختونخوا میں امن و امان اور انتظامی معاملات کے حوالے سے گورنر کے آئینی و انتظامی کردار کو وسعت دینے کی اہم پیش رفت قرار دیا جا رہا ہے۔