پی ٹی آئی کے سیاہ دور کا پردہ چاک، مشیر صحت نگار جوہر نے کے پی ہسپتالوں میں بیڈز کی قلت اور ڈاکٹرز کی تعیناتیوں میں بے ضابطگیوں کا پول کھول دیا

مشیر صحت خیبر پختونخوا لیفٹیننٹ جنرل (ر) نگار جوہر نے صوبے کے شعبہ صحت کی دگرگوں صورتحال، انتظامی خامیوں اور سنگین چیلنجز پر کھل کر روشنی ڈالی ہے۔

 انہوں نے پشاور میں ایک اہم پریس کانفرنس سے خطاب کرتے ہوئے کہا کہ صوبے میں صحت کے نظام کی بہتری کے لیے حکومتی اقدامات تیزی سے جاری ہیں، تاہم اس دیرینہ بحران پر قابو پانے کے لیے نجی شعبے کو بھی اپنا بھرپور کردار ادا کرنا ہوگا۔

پریس کانفرنس کے دوران مشیر صحت نے بتایا  کہ صوبے میں ماں اور بچے کی صحت کے اشاریے انتہائی تشویشناک ہیں،  اعداد و شمار کے مطابق ہر ایک ہزار میں سے 42 بچے پیدائش کے ابتدائی مراحل یا دورانِ زندگی لقمہ اجل بن جاتے ہیں، جبکہ بڑی تعداد میں مائیں بھی دورانِ زچگی جاں بحق ہو جاتی ہیں، جس میں ہنگامی بنیادوں پر کمی لانا وقت کی اہم ترین ضرورت ہے۔ 

مزید برآں، صوبے کے تقریباً 40 فیصد بچوں کی نشوونما (Growth) بری طرح متاثر ہو رہی ہے، جو آنے والی نسل کے لیے ایک بڑا لمحہ فکریہ ہے۔

ہسپتالوں میں بستروں کی شدید قلت

صوبائی ہسپتالوں کی حالت زار پر بات کرتے ہوئے لیفٹیننٹ جنرل (ر) نگار جوہر نے انکشاف  کیا کہ سرکاری ہسپتالوں میں بستروں (Beds) اور ہیلتھ کیئر ورکرز کی شدید کمی ہے ، صورتحال اس قدر ابتر ہے کہ بعض ہسپتالوں میں ایک ہی بستر پر تین تین مریض علاج کروانے پر مجبور ہیں۔ ان کا کہنا تھا کہ بنیادی ڈھانچے کی اس خامی کو دور کرنے کے لیے ترجیحی بنیادوں پر کام کیا جا رہا ہے۔

پولیو کا خاتمہ اور ویکسین کی تیاری

پولیو کے حوالے سے گفتگو کرتے ہوئے انہوں نے کہا کہ دنیا بھر سے پولیو کا خاتمہ ہو چکا ہے، لیکن بدقسمتی سے پاکستان اور افغانستان اب بھی ان چند ممالک میں شامل ہیں جہاں یہ ناسور ہنوز موجود ہے۔ اس مرض کا مکمل خاتمہ تبھی ممکن ہے جب اس کے خلاف اجتماعی اور بھرپور قومی جدوجہد کی جائے۔ انہوں نے صوبے میں ویکسین کی تیاری اور عملے کی تربیت کے عمل کو وسعت دینے کی شدید ضرورت پر بھی زور دیا۔

پرائمری ہیلتھ کیئر، ڈیجیٹائزیشن اور ادویات کا معیار

مشیر صحت نے واضح کیا کہ موجودہ انتظامیہ کی اولین ترجیح پرائمری ہیلتھ کیئر (بنیادی صحت کی سہولتیں) کی بہتری ہے۔ نظام میں شفافیت لانے اور بے ضابطگیوں کے راستے بند کرنے کے لیے ڈیجیٹائزیشن کا عمل تیزی سے جاری ہے، کیونکہ اس کے بغیر کرپشن اور انتظامی خامیوں کا خاتمہ ناممکن ہے۔

ادویات کے معیار پر کڑی تشویش کا اظہار کرتے ہوئے انہوں نے کہا کہ ادویات کا معیار ایک بڑا سوالیہ نشان بن چکا ہے، جس سے نمٹنے کے لیے صوبے کے پانچوں ڈویژنز کو فوری ٹیسٹنگ کے لیے پانچ موبائل ڈرگ ٹیسٹنگ لیبارٹریز فراہم کر دی گئی ہیں۔

ڈاکٹروں کی غیر متوازن تعیناتیاں اور تعطل کا شکار منصوبے

تقرریوں پر بات کرتے ہوئے انہوں نے بتایا کہ حکومت نے حال ہی میں 250 نئے ڈاکٹرز بھرتی کیے ہیں، لیکن بدانتظامی کا عالم یہ ہے کہ غیر ضروری مقامات پر ایک ہی سیٹ پر تین تین ڈاکٹر تعینات ہیں جبکہ دور دراز اور ضرورت مند شہروں میں ڈاکٹروں کی شدید قلت ہے۔ اس عدم توازن کو ختم کرنے کے لیے اب منصفانہ تعیناتیاں کی جا رہی ہیں۔

منصوبوں کی تاخیر کا ذکر کرتے ہوئے انہوں نے بتایا کہ ڈی ایچ کیو ہسپتال مردان کا منصوبہ سال 2012 سے التواء کا شکار ہے جو تاحال مکمل نہیں ہو سکا، جبکہ خیبر انسٹیٹیوٹ آف چائلڈ ہیلتھ کو فعال بنانا بھی انتہائی ناگزیر ہے۔

خواتین میں چھاتی کا کینسر اور رجسٹریشن کا فقدان

مشیر صحت  نے بتایا کہ خواتین میں زچگی کے بعد ہونے والی اموات میں چھاتی کے کینسر (Breast Cancer) سے ہونے والی اموات بھی انتہائی اہم ہیں، تاہم المیہ یہ ہے کہ خیبر پختونخوا میں اب تک چھاتی کے کینسر کا ایک بھی باضابطہ کیس رجسٹرڈ نہیں کیا گیا، جو صوبے کے صحت کے ڈیٹا بیس کی سنگین خامیوں کو واضح کرتا ہے۔