دالبندین ایئرپورٹ پر حملے کا منصوبہ ناکام ، خفیہ اطلاع پر بروقت کارروائی نے دہشتگردوں کا پلان خاک میں ملا دیا

 بلوچستان کے ضلع چاغی میں سیکیورٹی فورسز نے ایک بروقت اور خفیہ اطلاع پر مبنی کارروائی (IBO) کرتے ہوئے دالبندین ایئرپورٹ، زائرین کے قافلوں اور مال بردار ٹرکوں کو نشانہ بنانے کا ایک بڑا منصوبہ ناکام بنا دیا ہے۔

سوشل میڈیا اور غیر مصدقہ حلقوں میں دالبندین ایئرپورٹ پر حملے کی گردش کرنے والی خبروں کے برعکس، اندرونی آپریشنل دستاویزات اور سیکیورٹی ذرائع سے حاصل ہونے والے حقائق یہ واضح کرتے ہیں کہ ایئرپورٹ پر کوئی حملہ نہیں ہوا، بلکہ سیکیورٹی اداروں نے حملہ آوروں کو ان کی منصوبہ بندی اور ریکی (جاسوسی) کے مرحلے میں ہی گھیر کر ہلاک کر دیا۔

سیکیورٹی ذرائع سے موصول ہونے والی تفصیلات کے مطابق، قانون نافذ کرنے والے اداروں کو گزشتہ چند روز سے مصدقہ اطلاعات موصول ہو رہی تھیں کہ کالعدم عسکریت پسند نیٹ ورک “فتنہ الہندوستان” (FAH) سے وابستہ عناصر دالبندین میں حساس تنصیبات کو نشانہ بنانے کی منصوبہ بندی کر رہے ہیں۔

ان کے اہداف میں دالبندین ایئرپورٹ، ایران آنے جانے والے زائرین کا ریسٹ ایریا اور علاقے میں موجود تجارتی ٹرکوں کا اڈہ (اسٹیجنگ ایریا) شامل تھے ،  اطلاعات کی تصدیق اور دہشت گردوں کے گرد گھیرا تنگ کرنے کے لیے 14 نومبر 2026 کی شب تقریباً ساڑھے گیارہ بجے فرنٹیئر کور (دالبندین رائفلز) کی ایک خصوصی ٹیم نے ڈھاڈر نالہ کے علاقے میں آپریشن کا آغاز کیا ، آپریشن کے آغاز کے محض پانچ منٹ بعد، رات 11 بج کر 35 منٹ پر کوئٹہ-تفتان مرکزی شاہراہ (این-40) پر ڈھاڈر لنڈی کے مقام کے قریب سیکیورٹی دستے کا آمنا سامنا دو مشکوک مسلح افراد سے ہوا، جو ابتدائی تحقیقات کے مطابق ممکنہ حملے کے لیے علاقے کی ریکی کر رہے تھے۔

سیکیورٹی اہلکاروں کو دیکھتے ہی مسلح ملزمان نے اندھا دھند فائرنگ شروع کر دی اور اندھیرے کا فائدہ اٹھاتے ہوئے قریبی برساتی نالے (ڈھاڈر نالہ) میں دو مختلف سمتوں میں فرار ہونے کی کوشش کی۔

محاصرہ اور انجام 

سیکیورٹی فورسز نے فوری جوابی کارروائی کرتے ہوئے فرار ہونے والے دہشت گردوں کا تعاقب کیا۔ اسی دوران انسدادِ دہشت گردی کی دو ریزرو ٹیمیں بھی فوری طور پر جائے وقوعہ پر پہنچ گئیں اور نالے کے تمام داخلی و خارجی راستوں کی ناکہ بندی کر دی تاکہ ملزمان فرار نہ ہو سکیں۔

دو طرفہ شدید فائرنگ کے تبادلے کے بعد سیکیورٹی فورسز نے دونوں دہشت گردوں کو ہلاک کر دیا ، سرچ آپریشن کے دوران ملزمان کے قبضے سے ایک موٹر سائیکل، دو سب مشین گنیں (SMGs)، سات میگزین، 210 گولیاں، ایک کمبل اور موٹر سائیکل کی مرمت کا سامان برآمد ہوا ، جو اس بات کی نشاندہی کرتا ہے کہ ملزمان طویل مسافت طے کر کے علاقے میں کارروائی کی تیاری کے ساتھ داخل ہوئے تھے۔

افواہوں اور زمینی حقیقت 

واقعے کے بعد بعض حلقوں کی جانب سے دالبندین ایئرپورٹ پر براہِ راست حملے کی قیاس آرائیاں کی گئیں، تاہم آپریشنل شواہد اس کی مکمل نفی کرتے ہیں۔

سیکیورٹی ماہرین کے مطابق این-40 شاہراہ اور ڈھاڈر نالہ کا محلِ وقوع تزویراتی طور پر انتہائی اہم ہے، کیونکہ یہی راستہ ایئرپورٹ اور زائرین کی گزرگاہوں کی طرف جاتا ہے۔ اگر بروقت انٹیلی جنس کی بنیاد پر ملزمان کو ریکی کے دوران ہی نہ روکا جاتا، تو یہ عناصر ایئرپورٹ یا شہری آبادی کے لیے سنگین خطرہ بن سکتے تھے ، سیکیورٹی فورسز کی پیشہ ورانہ حکمتِ عملی نے حملے سے قبل ہی اس نیٹ ورک کا خاتمہ کر کے علاقے کو ایک بڑے نقصان سے بچا لیا۔