چین میں جاری ایشیا پیسیفک اقتصادی تعاون (اے پی ای سی) کے سربراہی اجلاس کے دوران امریکی صدر ڈونلڈ ٹرمپ چینی صدر شی جن پنگ کی تقریر سنتے ہوئے بظاہر اونگھتے دکھائی دیے، جس کے مناظر کیمرے میں محفوظ ہوگئے۔
امریکی نشریاتی ادارے سی این این کے مطابق جمعرات، 19 نومبر کو اے پی ای سی سربراہی اجلاس کے دوران چینی صدر شی جن پنگ خطاب کر رہے تھے کہ امریکی صدر ڈونلڈ ٹرمپ آنکھیں بند کیے اپنی نشست پر بیٹھے نظر آئے۔ اجلاس کی ویڈیو میں ٹرمپ کو بظاہر اونگھتے دیکھا جا سکتا ہے، تاہم محض آنکھیں بند ہونے سے یہ واضح نہیں ہوتا کہ وہ واقعی سو رہے تھے۔
یہ پہلا موقع نہیں جب امریکی صدر کسی عوامی تقریب کے دوران آنکھیں بند کیے کیمروں کی زد میں آئے ہوں۔
چین کے شہر شینزن میں منعقدہ اے پی ای سی سربراہی اجلاس میں شرکت کے دوران ڈونلڈ ٹرمپ نے روسی صدر ولادیمیر پیوٹن اور چینی صدر شی جن پنگ سے الگ الگ ملاقاتیں بھی کیں۔ سہ فریقی مذاکرات سے قبل ٹرمپ نے یوکرین کے خلاف روس کی جنگ سے متعلق ممکنہ بات چیت پر بھی متعدد بیانات دیے۔
دوسری جانب چینی صدر کے خطاب کے دوران روسی صدر ولادیمیر پیوٹن کی توجہ اجلاس کی کارروائی پر مرکوز رہی، جبکہ کینیڈا کے وزیراعظم مارک کارنی اور ہانگ کانگ کے رہنما جان لی نوٹس لیتے دکھائی دیے۔
اجلاس کے دوران جاپان کی وزیراعظم سنائے تاکائچی کو بھی شی جن پنگ کے خطاب کے بعض حصوں میں مسکراتے ہوئے دیکھا گیا۔
