پاکستان میں 5 فروری کو یومِ یکجہتی کشمیر کے موقع پر ملک بھر میں عام تعطیل ہوگی، اس روز کشمیری عوام کی بھارتی تسلط اور مظالم کے خلاف جاری جدوجہدِ آزادی اور عظیم قربانیوں کو خراجِ تحسین پیش کیا جائے گا۔
اس روز تمام سرکاری و نجی دفاتر، تعلیمی ادارے اور بیشتر کاروباری مراکز ملک بھر میں بند رہیں گے، وفاقی اور صوبائی حکومتوں کی جانب سے تعطیل کے باضابطہ نوٹیفکیشن جاری کر دیے گئے ہیں تاکہ شہری یومِ کشمیر کی سرگرمیوں اور یکجہتی کی تقریبات میں شرکت کر سکیں۔
کشمیریوں سے اظہارِ یکجہتی کے لیے پورے ملک میں ریلیاں، واکس، سیمینارز اور خصوصی دعائیہ تقریبات کا اہتمام کیا جائے گا، جبکہ قومی یکجہتی کے اظہار کے طور پر مختلف مقامات پر انسانی زنجیریں بھی بنائی جائیں گی۔
حکومت نے ریاستی اداروں اور میڈیا کو ہدایت جاری کی ہے کہ مسئلہ کشمیر کو مؤثر انداز میں اجاگر کیا جائے اور قومی و بین الاقوامی سطح پر اس حوالے سے آگاہی میں اضافہ کیا جائے۔
اس موقع پر ٹیلی ویژن اور ریڈیو پر خصوصی پروگرام نشر کیے جائیں گے جن میں مسئلہ کشمیر کے تاریخی پس منظر اور موجودہ صورتحال پر تفصیلی روشنی ڈالی جائے گی۔
یومِ یکجہتی کشمیر کے پُرامن انعقاد کو یقینی بنانے کے لیے بڑے شہروں میں سکیورٹی کے سخت انتظامات کیے جانے کا امکان ہے، جبکہ قانون نافذ کرنے والے ادارے ریلیوں اور عوامی اجتماعات کے دوران مکمل طور پر الرٹ رہیں گے۔
سیاسی و مذہبی رہنما مختلف تقریبات سے خطاب کریں گے اور اس عزم کا اعادہ کریں گے کہ مسئلہ کشمیر کو اقوامِ متحدہ کی سلامتی کونسل کی قراردادوں کے مطابق حل کیا جانا ناگزیر ہے۔
شہریوں سے اپیل کی گئی ہے کہ وہ اس دن کو پُرامن اور نظم و ضبط کے ساتھ منائیں، یومِ یکجہتی کشمیر کشمیری عوام کے لیے پاکستان کی مسلسل سفارتی، اخلاقی اور سیاسی حمایت کی عکاسی کرتا ہے۔
By 
