فیفا ورلڈ کپ ،رونالڈو کا خواب پھر پورا نہ ہو سکا، اسپین نے پرتگال کو ناک آؤٹ کر دیا

فیفا ورلڈ کپ 2026 کے پری کوارٹر فائنل میں اسپین نے انتہائی سنسنی خیز مقابلے کے بعد پرتگال کو 0-1 سے شکست دے کر کوارٹر فائنل کے لیے کوالیفائی کر لیا، جبکہ پرتگال ایونٹ سے باہر ہوگیا۔ میچ کے آخری لمحات میں کیے گئے فیصلہ کن گول نے اسپین کو فتح دلائی اور پرتگال کی واپسی کی تمام امیدیں ختم کر دیں۔

امریکا کے شہر ڈیلاس میں کھیلے گئے اس اہم ناک آؤٹ مرحلے کے میچ میں دونوں ٹیموں نے آغاز سے ہی جارحانہ کھیل پیش کیا۔ اسپین نے گیند پر زیادہ کنٹرول رکھتے ہوئے متعدد حملے کیے، تاہم پرتگال کے دفاع اور گول کیپر نے انہیں کامیاب ہونے سے روکے رکھا۔ دوسری جانب پرتگال نے بھی جوابی حملوں کے ذریعے اسپین کے دفاع کو آزمائش میں ڈالا لیکن دونوں ٹیمیں مقررہ وقت کے بیشتر حصے میں گول کرنے میں ناکام رہیں۔

 یہ بھ پڑھیں :فیفا ورلڈ کپ : انگلینڈ، فرانس اور میزبان میکسیکو کی پری کوارٹر فائنل میں رسائی

میچ اس وقت فیصلہ کن موڑ پر پہنچا جب 90ویں منٹ میں اسپین کے مڈفیلڈر میکائیل میرینو نے شاندار انداز میں گیند کو جال کی راہ دکھائی۔ اس گول نے نہ صرف اسپین کو برتری دلائی بلکہ پرتگال کی ٹورنامنٹ میں واپسی کی امیدوں پر بھی پانی پھیر دیا۔ اضافی وقت میں پرتگال نے برابری کے گول کے لیے بھرپور کوشش کی تاہم اسپین کے مضبوط دفاع نے تمام حملے ناکام بنا دیے اور یوں میچ 0-1 کے نتیجے پر اختتام پذیر ہوا۔

اس فتح کے ساتھ اسپین نے فیفا ورلڈ کپ 2026 کے کوارٹر فائنل میں جگہ بنا لی جہاں اس کا مقابلہ امریکا اور بیلجیئم کے درمیان کھیلے جانے والے پری کوارٹر فائنل کی فاتح ٹیم سے ہوگا۔ ہسپانوی ٹیم کی منظم حکمت عملی، مضبوط دفاع اور آخری لمحات تک جدوجہد نے اسے ٹورنامنٹ میں مزید آگے بڑھنے کا موقع فراہم کیا۔

 یہ بھی پڑھیں :فیفا ورلڈ کپ میں ناروے سے شکست ، برازیل کے سٹا ر فٹبالر نیمار نے بڑا اعلان کردیا

دوسری جانب اس شکست کے ساتھ ہی پرتگال کا ورلڈ کپ میں سفر اختتام پذیر ہوگیا، جبکہ ٹیم کے تجربہ کار کپتان کرسٹیانو رونالڈو کا عالمی کپ جیتنے کا خواب ایک بار پھر پورا نہ ہو سکا۔ رونالڈو نے پورے میچ میں اپنی ٹیم کو کامیابی دلانے کی کوشش کی تاہم اسپین کے منظم دفاع اور سخت مارکنگ کے باعث وہ خاطر خواہ مواقع پیدا نہ کر سکے۔