شہباز شریف کا بارشوں اور سیلاب سے متاثرہ خاندانوں کی مالی معاونت کا حکم

وزیراعظم شہباز شریف نے حالیہ بارشوں اور سیلاب سے متاثرہ خاندانوں کی مالی معاونت کا حکم دے دیا، جبکہ متاثرہ علاقوں میں امدادی سرگرمیوں اور بحالی کے کام کو مزید تیز کرنے کی ہدایت کردی۔

حالیہ بارشوں کے باعث ہونے والے نقصانات، مون سون کی صورتحال اور جاری امدادی کارروائیوں کے حوالے سے اہم اجلاس ہوا،اجلاس میں وزیراعظم شہباز شریف کو ملک کے مختلف علاقوں میں بارشوں اور سیلاب سے پیدا ہونے والی صورتحال، متاثرہ خاندانوں اور امدادی سرگرمیوں میں ہونے والی پیش رفت کے بارے میں بریفنگ دی گئی۔

وزیراعظم نے صورتحال کا جائزہ لیتے ہوئے متعلقہ اداروں کو ہدایت کی کہ متاثرہ علاقوں میں امدادی سرگرمیوں کو مزید مؤثر بنایا جائے اور بارشوں و سیلاب سے متاثرہ افراد کو ہر ممکن سہولت فراہم کی جائے۔

متاثرہ خاندانوں کی مالی مدد

وزیراعظم شہباز شریف نے بارشوں اور سیلاب سے متاثرہ خاندانوں کی مالی معاونت کا حکم دیتے ہوئے کہا کہ مشکل صورتحال میں متاثرین کو تنہا نہیں چھوڑا جائے گا۔

انہوں نے متعلقہ حکام کو ہدایت کی کہ متاثرہ خاندانوں تک امدادی وسائل کی فراہمی میں تاخیر نہ کی جائے اور مالی معاونت کے عمل کو مؤثر انداز میں آگے بڑھایا جائے تاکہ متاثرین اپنی فوری ضروریات پوری کرسکیں۔

وفاقی وزرا اور سیکریٹریز کو ہدایات

وزیراعظم نے وفاقی وزرا اور سیکریٹریز کو متاثرہ علاقوں کا دورہ کرنے اور وہاں جاری بحالی کے کاموں کی نگرانی کرنے کی ہدایت کی،شہباز شریف نے کہا کہ وفاقی حکومت کے نمائندے خود متاثرہ علاقوں میں موجود رہیں اور صورتحال کا براہ راست جائزہ لیں۔ انہوں نے امدادی سرگرمیوں میں انتظامی رکاوٹوں کو دور کرنے اور متاثرین تک فوری مدد پہنچانے پر زور دیا۔

یہ بھی پڑھیں :وزیر اعظم کا پمز ہسپتال میں طبی سہولتوں کی عدم فراہمی پر نوٹس،تحقیقات کا حکم

امدادی سامان کی فوری فراہمی

وزیراعظم نے متاثرہ خاندانوں تک غذائی اشیا اور دیگر ضروری امدادی سامان جلد از جلد پہنچانے کی ہدایت بھی کی،انہوں نے کہا کہ بارشوں اور سیلاب سے متاثرہ افراد کی بنیادی ضروریات کو ترجیحی بنیادوں پر پورا کیا جائے اور امدادی سامان کی تقسیم کے عمل کو مؤثر بنایا جائے۔

تباہ شدہ گھروں کی بحالی

اجلاس میں بارشوں اور سیلاب سے تباہ ہونے والے گھروں اور بنیادی ڈھانچے کی بحالی کا معاملہ بھی زیر غور آیا،وزیراعظم نے متعلقہ اداروں کو ہدایت کی کہ تباہ شدہ گھروں اور بنیادی ڈھانچے کی فوری بحالی کے لیے اقدامات کیے جائیں،انہوں نے کہا کہ متاثرہ علاقوں میں بحالی کا عمل بلا تاخیر شروع کیا جائے تاکہ معمولات زندگی جلد بحال ہوسکیں۔

امدادی سرگرمیاں مزید تیز کرنے کا حکم

وزیراعظم شہباز شریف نے امدادی کارروائیوں کو مزید تیز کرنے کی ہدایت کرتے ہوئے کہا کہ متاثرین کو فوری ریلیف کی فراہمی حکومت کی ترجیح ہے،انہوں نے متعلقہ وفاقی اداروں اور حکام کو باہمی رابطے کے ساتھ کام کرنے کی ہدایت کی تاکہ بارشوں اور سیلاب سے متاثرہ علاقوں میں امدادی اور بحالی کی سرگرمیوں کو مؤثر انداز میں مکمل کیا جاسکے۔

وزیراعظم نے اس عزم کا اظہار کیا کہ حکومت متاثرہ خاندانوں کو ریلیف فراہم کرنے اور بارشوں و سیلاب سے ہونے والے نقصانات کے ازالے کے لیے تمام ضروری اقدامات کرے گی۔