ٹرمپ کا نیا دفاعی منصوبہ، روس کو یورپ کےسکیورٹی ڈھانچےمیں شامل کرنے کی تجویز

امریکی صدر ڈونلڈ ٹرمپ کی انتظامیہ نے یوکرین جنگ کے خاتمے کے بعد یورپ کے لیے ایک نئے دفاعی اور سلامتی نظام کی تشکیل میں روس کو بھی شامل کرنے کی تجویز پیش کردی ہے، جس پر یورپی ممالک نے تحفظات کا اظہار کرتے ہوئے واضح کیا ہے کہ براعظم کے مستقبل اور سلامتی سے متعلق فیصلے یورپی ممالک کی شمولیت کے بغیر قبول نہیں کیے جائیں گے۔

فرانسیسی میڈیا کی رپورٹ کے مطابق ابوظبی میں امریکا، روس اور یوکرین کے درمیان ہونے والے مذاکرات میں جنگ بندی کے علاوہ یوکرین جنگ کے بعد یورپ کے مستقبل کے دفاعی ڈھانچے پر بھی تفصیلی تبادلہ خیال کیا گیا۔ امریکی تجویز کے تحت روس کو یورپ کے نئے سلامتی نظام کا حصہ بنانے کا تصور پیش کیا گیا، جسے روسی مذاکراتی وفد کے سربراہ نے ماسکو کے لیے مثبت پیشرفت قرار دیا۔

رپورٹ کے مطابق روسی وزارت خارجہ نے بھی یورپی ممالک کو نئے دفاعی معاہدوں کی پیشکش کی ہے، تاہم ابوظبی مذاکرات میں یورپ کے مستقبل کے دفاعی نظام سے متعلق کوئی حتمی اتفاق رائے سامنے نہیں آسکا۔

امریکی تجویز پر یورپی یونین کی خارجہ پالیسی کی سربراہ کایا کالاس نے تحفظات کا اظہار کرتے ہوئے کہا کہ یورپ کا اپنا سلامتی نظام پہلے سے موجود ہے، اصل مسئلہ روس کی جانب سے بین الاقوامی معاہدوں اور طے شدہ ذمہ داریوں کی پاسداری نہ کرنا ہے۔ جرمن وزیر خارجہ نے بھی ماسکو پر زور دیا ہے کہ وہ ماضی میں کیے گئے بین الاقوامی معاہدوں کا احترام کرے اور اپنی ذمہ داریوں کو پورا کرے۔

یہ بھی پڑھیں :ٹرمپ نے نائب صدر جے ڈی وینس کو ایران امن مذاکرات سے ہٹا کر امریکا کے داخلی معاملات پر توجہ دینے کی ہدایت کر دی

دوسری جانب 13 نومبر کو ڈبلن میں تقریباً 40 یورپی ممالک کے رہنماؤں نے اپنے مشترکہ مؤقف میں واضح کیا کہ یورپ کے مستقبل اور سلامتی سے متعلق کوئی بھی فیصلہ یورپی ممالک کی شرکت کے بغیر نہیں کیا جاسکتا۔ یورپی قیادت کا کہنا ہے کہ روس کے ساتھ مذاکرات کے دروازے بند نہیں، تاہم کسی بھی نئے دفاعی معاہدے میں یورپ کی سلامتی، یوکرین کی خودمختاری اور نیٹو کے موجودہ دفاعی ڈھانچے کو نظرانداز نہیں کیا جاسکتا۔

ادھر یوکرینی صدر ولودومیر زیلنسکی نے بھی خدشہ ظاہر کیا ہے کہ روس وسیع تر سلامتی مذاکرات کو استعمال کرتے ہوئے یوکرین کے مستقبل، خودمختاری اور جنگ کے بنیادی معاملات کو پس منظر میں دھکیلنے کی کوشش کرسکتا ہے۔

مجموعی طور پر امریکی تجویز نے یورپ کے مستقبل کے دفاعی ڈھانچے، نیٹو کے کردار اور روس کے ساتھ تعلقات کے حوالے سے نئی بحث چھیڑ دی ہے، جبکہ یورپی ممالک اس بات پر قائم ہیں کہ ان کی سلامتی سے متعلق فیصلوں میں ان کی براہ راست شرکت بنیادی اہمیت رکھتی ہے۔