عالمی منڈی میں خلیجی سپلائی کی بحالی اور طلب میں کمی کے باعث خام تیل کی قیمتوں میں شدید گراوٹ کا سلسلہ جاری ہے، جس سے سرمایہ کاروں کے پرانے خدشات دم توڑ گئے ہیں۔
عالمی منڈی میں خام تیل کے نرخوں میں مندی کا رجحان شدت اختیار کر گیا ہے ، برینٹ خام تیل کی قیمت میں 3.5 فیصد کی نمایاں کمی ریکارڈ کی گئی، جس کے بعد یہ 92.44 ڈالر فی بیرل پر بند ہوا۔ اسی طرح امریکی خام تیل (WTI) کے دام بھی 3.2 فیصد کمی کے ساتھ 85.72 ڈالر فی بیرل پر آ گئے۔
دونوں اہم بینچ مارک آئل کی قیمتوں میں مسلسل دوسرے ہفتے بھی گراوٹ دیکھی گئی ہے، جو اس بات کا غماز ہے کہ منڈی کا مزاج تیزی سے تبدیل ہو رہا ہے۔
سپلائی میں اضافہ اور رسد کے نئے تخمینے
قیمتوں میں اس اچانک اور مسلسل کمی کے پیچھے رسد اور طلب کا توازن ایک بار پھر کارفرما ہے ، بین الاقوامی مالیاتی اداروں اور انرجی ایجنسیوں کے تازہ ترین اعداد و شمار اس امر کی تصدیق کرتے ہیں کہ مارکیٹ میں تیل کی دستیابی طلب کے مقابلے میں بڑھ چکی ہے۔
جے پی مورگن کے اعداد و شمار
بینک کے تخمینے کے مطابق، عالمی سطح پر تیل کی رسد ستمبر میں طلب سے یومیہ 11 لاکھ بیرل اور اکتوبر میں 14 لاکھ بیرل زائد رہی۔
انٹرنیشنل انرجی ایجنسی (IEA) کی پیش گوئی: IEA کے مطابق، رواں سہ ماہی میں بھی عالمی سطح پر تیل کی سپلائی طلب سے زیادہ رہنے کا امکان ہے، جس سے مارکیٹ پر مسلسل دباؤ برقرار ہے۔
مستقبل کے امکانات
معروف عالمی بینکنگ اور سرمایہ کاری کے اداروں نے آئندہ برسوں کے لیے تیل کی قیمتوں کے حوالے سے نئی پیش گوئیاں جاری کی ہیں ، گولڈمین سیکس کا کہنا ہے کہ مشرق وسطیٰ کے تیل پیدا کرنے والے ممالک کی پیداوار مکمل طور پر بحال ہونے اور بلند قیمتوں کے باعث توانائی کی مجموعی طلب میں کمی واقع ہوئی ہے۔
اس صورتحال کے پیش نظر، ادارے نے سال 2027 میں عالمی منڈی میں یومیہ 20 لاکھ بیرل اضافی تیل کی رسد متوقع کی ہے۔
یہ بھی پڑھیں :خام تیل کی قیمتوں میں کمی، سپلائی میں اضافے کی توقع نے عالمی مارکیٹ میں ہلچل مچا دی
