حج 2025 معاہدہ، پاکستانی عازمین کو کیا کیا سہولیات میسر ہو ں گی؟

اسلام آباد: پاکستان اور سعودی عرب نے حج 2025 کے حوالے سے ایک اہم معاہدے پر دستخط کیے ہیں جس کے تحت پاکستانی عازمین کو مزید بہتر سہولیات فراہم کرنے کا فیصلہ کیا گیا ہے۔ یہ معاہدہ وفاقی وزیر مذہبی امور چوہدری سالک حسین اور سعودی وزیر حج و عمرہ ڈاکٹر توفیق بن فوزان الربیعہ کے درمیان طے پایا ہے۔

اس معاہدے کے مطابق، حج 2025 کے لیے 1 لاکھ 79 ہزار 210 پاکستانی عازمین فریضہ حج ادا کریں گے۔ سعودی عرب کی جانب سے پاکستانی حجاج کو منیٰ میں خصوصی جگہ فراہم کرنے کے ساتھ ساتھ اس کے نرخ بھی کم کرنے پر اتفاق ہوا ہے ساتھ ہی
عازمین کے لیے 20 سے 25 دن کا مختصر حج شیڈول متعارف کرایا گیا ہے، تاکہ سفر کو آسان اور آرام دہ بنایا جا سکے۔

یہ بھی پڑھیں: عالمی منڈی میں تیل کی قیمتیں بلند ، پاکستان میں بھی اضافہ متوقع 

  مزید برآں عازمین مدینہ منورہ میں چار سے آٹھ دن تک رہائش کا انتخاب اپنی سہولت کے مطابق کر سکیں گے۔ ہر عازم کو ایک خصوصی بیگ فراہم کیا جائے گا جس میں پاکستانی پرچم، کیو آر کوڈ اور دیگر ضروری معلومات شامل ہوں گی۔ اس کے علاوہ ایک موبائل ایپ کے ذریعے عازمین کو فلائٹ شیڈول، رہائش کی تفصیلات، حج مقامات کے نقشے اور لائیو لوکیشن جیسی معلومات فوری دستیاب ہوں گی۔

وفاقی وزیر مذہبی امور چوہدری سالک حسین جدہ میں جاری چار روزہ بین الاقوامی حج کانفرنس میں بھی شرکت کریں گے، جہاں مزید معاہدے کیے جائیں گے تاکہ عازمین کو مزید سہولیات فراہم کی جا سکیں۔یہ معاہدہ نہ صرف عازمین کی سہولت کے لیے اہم ہے بلکہ دونوں ممالک کے درمیان تعلقات کو مضبوط بنانے کی جانب ایک اہم قدم بھی ہے۔