پاکستان بھر میں انٹرنیٹ صارفین کو مشکلات کا سامنا ہے کیونکہ بین الاقوامی سب میرین کیبل میں تکنیکی خرابی پیدا ہوگئی ہے۔ پاکستان ٹیلی کمیونیکیشن اتھارٹی (پی ٹی اے) نے خرابی کی تصدیق کرتے ہوئے کہا ہے کہ انٹرنیٹ سروس کا معیار متاثر ہونے کا خدشہ ہے۔
پی ٹی اے کے مطابق بین الاقوامی سب میرین کیبل میں خرابی پاکستان کے ساحل سے تقریباً 11 کلومیٹر دور پیش آئی ہے۔ اس تکنیکی مسئلے کے باعث ملک بھر میں انٹرنیٹ کی رفتار کم ہوسکتی ہے اور صارفین کو آن لائن سرگرمیوں میں دشواری کا سامنا کرنا پڑ سکتا ہے۔
ترجمان پی ٹی اے نے بتایا کہ خرابی کی اصل وجہ معلوم کرنے کیلئے ٹرانس ورلڈ ایسوسی ایٹس اور کیبل کنسورشیم سے رابطہ کیا جارہا ہے۔ متعلقہ ادارے سب میرین کیبل کی مرمت اور انٹرنیٹ سروس کی مکمل بحالی کے متوقع وقت کا تعین کرنے میں مصروف ہیں۔
متبادل انتظامات شروع
پی ٹی اے کے مطابق صارفین کو مشکلات سے بچانے کیلئے انٹرنیٹ ٹریفک متبادل بین الاقوامی لنکس پر منتقل کی جارہی ہے۔ اس اقدام کا مقصد کیبل میں خرابی کے باعث انٹرنیٹ سروس پر پڑنے والے اثرات کو کم سے کم رکھنا ہے۔
ترجمان کا کہنا ہے کہ اتھارٹی صورتحال کی مسلسل نگرانی کررہی ہے اور متعلقہ اداروں سے رابطے میں ہے۔ ملک بھر میں انٹرنیٹ سروس معمول پر لانے کیلئے ہنگامی اقدامات جاری ہیں۔
پی ٹی اے نے بتایا کہ کیبل کی مرمت اور بحالی کے وقت سے متعلق معلومات حاصل کی جارہی ہیں۔ اس حوالے سے پیش رفت سامنے آنے پر مزید تفصیلات فراہم کی جائیں گی۔