راولپنڈی میں سیف سٹی کیمروں کے ذریعے ای چالان سسٹم متعارف کروانے کا فیصلہ کیا گیا ہے۔
شہریوں کو ٹریفک قوانین کی مزید سختی سے پابند بنانے کے لیے ایک نیا خودکار نظام متعارف کرایا گیا ہے، جس کے تحت اب ٹریفک قوانین کی خلاف ورزی پر کیمروں کی مدد سے خود بخود ای چالان جاری کیا جائے گا۔
اس جدید نظام کا مقصد سڑکوں پر نظم و ضبط قائم رکھنا، قوانین کی خلاف ورزی کو کم کرنا اور جرمانوں کے عمل کو زیادہ شفاف اور موثر بنانا ہے ، اس اقدام سے نہ صرف شہریوں میں احتیاط اور ذمہ داری کا احساس بڑھے گا بلکہ ٹریفک پولیس کے کام کے بوجھ میں بھی کمی آئے گی۔
سیف سٹی اور سٹی ٹریفک پولیس کے مطابق یہ آٹومیٹڈ سسٹم جدید کیمروں اور مصنوعی ذہانت کی مدد سے کام کرے گا، جو ٹریفک قوانین کی مختلف خلاف ورزیوں کو خودکار طریقے سے ریکارڈ کرے گا۔
ان خلاف ورزیوں میں بغیر ہیلمٹ موٹر سائیکل چلانا، سگنل توڑنا، زیبرا کراسنگ پر گاڑی نہ روکنا، لین یا لائن کی خلاف ورزی کرنا، اور مقررہ حد سے زیادہ رفتار سے گاڑی چلانا شامل ہیں ، جیسے ہی کوئی خلاف ورزی ریکارڈ ہوگی، سسٹم متعلقہ گاڑی کے مالک کو چالان ایس ایم ایس اور ای میل کے ذریعے بھیج دے گا تاکہ شہری کو فوری طور پر اطلاع مل سکے۔
اس کے علاوہ، شہریوں کی سہولت کے پیش نظر چالان کی ادائیگی کا عمل بھی مکمل طور پر آن لائن کر دیا گیا ہے، اب شہری کسی دفتر میں لائن میں لگنے یا وقت ضائع کیے بغیر گھر بیٹھے اپنے جرمانے ادا کر سکیں گے۔
اگر کوئی شخص مقررہ مدت میں چالان جمع نہیں کرواتا، تو اس کے خلاف قانونی کارروائی عمل میں لائی جائے گی، جس میں لائسنس کی معطلی یا گاڑی کے اندراج پر پابندی جیسے اقدامات شامل ہو سکتے ہیں۔
سٹی ٹریفک پولیس کے ترجمان کے مطابق اس خودکار نظام کے نفاذ سے نہ صرف ٹریفک مینجمنٹ میں بہتری آئے گی بلکہ سڑکوں پر حادثات کی شرح میں بھی کمی متوقع ہے۔
انہوں نے شہریوں سے اپیل کی کہ وہ ٹریفک قوانین کی مکمل پاسداری کریں، خاص طور پر موٹر سائیکل سوار ہمیشہ ہیلمٹ کا استعمال کریں، کیونکہ اب ہر خلاف ورزی پر آنکھ رکھنے والا نظام موجود ہے، یہ اقدام جدید ٹریفک مینجمنٹ کی سمت میں ایک اہم قدم ہے جو شہریوں کی حفاظت اور سڑکوں کی سلامتی کو یقینی بنانے میں سنگِ میل ثابت ہوگا۔
By 
