By خیبرپختونخوا پولیس کے اہلکاروں کی شہادت پر وزیراعظم کا اظہار افسوس، ڈی ایس پی حیدر زمان سمیت تمام شہداء کو خراج عقیدت پیش کیا۔ دہشت گردی کے خلاف جنگ جاری رکھنے اور ملک سے بدامنی کے خاتمے کے عزم کا اظہار کیا۔
وزیراعظم شہباز شریف نے کوہاٹ کے علاقے دارہ بکاخ میں دہشت گردوں کے حملے کی شدید مذمت کرتے ہوئے خیبرپختونخوا پولیس کے 10 اہلکاروں کی شہادت پر گہرے دکھ اور افسوس کا اظہار کیا ہے۔
وزیراعظم نے دہشت گردوں کے خلاف بہادری سے مقابلہ کرتے ہوئے جام شہادت نوش کرنے والے ڈی ایس پی حیدر زمان سمیت تمام اہلکاروں کو خراج عقیدت پیش کیا۔ ان کا کہنا تھا کہ پولیس کے بہادر افسران اور جوانوں نے فرض شناسی، جرأت اور پیشہ ورانہ صلاحیتوں کی مثال قائم کی ہے۔
شہباز شریف نے کہا کہ وطن عزیز کے امن و سلامتی کے لیے جانیں قربان کرنے والے پولیس اہلکار قوم کے ہیرو ہیں۔ خیبرپختونخوا پولیس نے دہشت گردی کے خلاف جنگ میں بے شمار قربانیاں دی ہیں اور پوری قوم ان کی خدمات کو قدر کی نگاہ سے دیکھتی ہے۔
وزیراعظم نے شہداء کے اہل خانہ سے دلی ہمدردی اور تعزیت کا اظہار کرتے ہوئے شہداء کے درجات کی بلندی اور لواحقین کے لیے صبر جمیل کی دعا کی۔
انہوں نے دہشت گردوں کے خلاف کارروائی میں 18 خوارج کی ہلاکت کو خیبرپختونخوا پولیس کی پیشہ ورانہ صلاحیتوں اور دہشت گردی کے خلاف غیرمتزلزل عزم کا مظہر قرار دیا۔
وزیراعظم نے کہا کہ جرائم پیشہ عناصر اور فتنہ الخوارج کا گٹھ جوڑ ملک میں بدامنی پھیلانے کی کوشش ہے۔ تاہم ایسے عناصر کو اپنے مذموم عزائم میں کامیاب نہیں ہونے دیا جائے گا۔
شہباز شریف نے کہا کہ دہشت گردی کے خلاف جنگ میں پولیس اور دیگر قانون نافذ کرنے والے اداروں کے اہلکار جس جرأت اور ثابت قدمی سے فرائض انجام دے رہے ہیں، وہ قابل تحسین ہے۔
انہوں نے کہا کہ پوری قوم دہشت گردی کے خلاف جنگ میں اپنی بہادر سیکیورٹی فورسز اور قانون نافذ کرنے والے اداروں کے ساتھ کھڑی ہے۔
وزیراعظم نے واضح کیا کہ پاکستان کے امن و استحکام پر کوئی سمجھوتہ نہیں کیا جائے گا۔ ملک سے دہشت گردی کے مکمل خاتمے کے لیے حکومت پُرعزم ہے۔
