عوام کے لیے بڑا ریلیف ،حکومت نے پیٹرول اور ڈیزل کی قیموں میں مزید کمی کا اعلان کردیا

حکومت نے عوام کو ریلیف دیتے ہوئے پیٹرولیم مصنوعات کی قیمتوں میں کمی کا اعلان کردیا ہے، جس کے تحت پیٹرول کی قیمت میں 3 روپے جبکہ ڈیزل کی قیمت میں 7 روپے فی لیٹر کمی کردی گئی ہے۔

آئل اینڈ گیس ریگولیٹری اتھارٹی (اوگرا) کی جانب سے جاری نوٹیفکیشن کے مطابق پیٹرول کی قیمت میں 3 روپے فی لیٹر کمی کی گئی ہے، جس کے بعد پیٹرول کی نئی قیمت 335 روپے فی لیٹر مقرر کردی گئی ہے۔

اسی طرح ڈیزل کی قیمت میں 7 روپے فی لیٹر کمی کا فیصلہ کیا گیا ہے، جس کے بعد ڈیزل کی نئی قیمت 364 روپے فی لیٹر ہوگئی ہے۔حکومت کی جانب سے جاری کردہ نوٹیفکیشن کے مطابق پیٹرولیم مصنوعات کی نئی قیمتوں کا اطلاق 12 نومبر سے ہوگا۔

پیٹرول کی قیمت میں کمی سے موٹر سائیکل سواروں، رکشہ مالکان اور نجی گاڑیاں استعمال کرنے والے شہریوں کو ریلیف ملنے کی توقع ہے، جبکہ ڈیزل سستا ہونے سے پبلک ٹرانسپورٹ، مال بردار گاڑیوں اور زرعی شعبے کے اخراجات میں کمی آسکتی ہے۔

ڈیزل کی قیمت میں کمی کو اس لیے بھی اہم قرار دیا جا رہا ہے کہ ٹرکوں، بسوں، ٹریکٹروں اور دیگر زرعی مشینری میں بڑے پیمانے پر ڈیزل استعمال ہوتا ہے۔ اس کے نتیجے میں اشیائے ضروریہ کی ترسیل اور زرعی سرگرمیوں کے اخراجات پر بھی مثبت اثر پڑنے کا امکان ہے۔