وزیراعظم شہباز شریف کل سے چین کے چار روزہ سرکاری دورے پر روانہ ہوں گے جہاں وہ چینی قیادت کے ساتھ اعلیٰ سطحی ملاقاتیں اور اہم اقتصادی مذاکرات کریں گے۔
ترجمان دفترِ خارجہ کے مطابق وزیراعظم 23 سے 26 مئی تک چین میں قیام کریں گے اس دوران وہ چینی صدر شی جن پنگ اور اپنے ہم منصب لی چیانگ سے ملاقاتیں کریں گے جن میں دوطرفہ تعلقات، اقتصادی تعاون اور علاقائی صورتحال پر تبادلۂ خیال کیا جائے گا۔
حکام کے مطابق یہ دورہ خصوصی اہمیت کا حامل ہے کیونکہ پاکستان اور چین اس سال اپنے سفارتی تعلقات کی 75 ویں سالگرہ منا رہے ہیں۔ دونوں ممالک کے درمیان ہر موسم کی اسٹریٹجک شراکت داری کو مزید مضبوط بنانے پر بھی گفتگو ہوگی۔
دورے کے دوران چین پاکستان اقتصادی راہداری چین پاکستان اقتصادی راہداری کے مختلف منصوبوں، تجارت، سرمایہ کاری، صنعتی تعاون، زراعت کی جدید کاری، انفارمیشن ٹیکنالوجی اور سائنس و ٹیکنالوجی کے شعبوں میں تعاون بڑھانے پر خصوصی توجہ دی جائے گی۔
وزیراعظم اپنے دورے کا آغاز صوبہ ژجیانگ کے شہر ہانگژو سے کریں گے، جہاں وہ آئی ٹی، ٹیلی کام، بیٹری انرجی اسٹوریج سسٹم اور زراعت کے شعبوں سے متعلق ”پاک-چین بی ٹو بی انویسٹمنٹ کانفرنس“ کی صدارت کریں گے۔
بعد ازاں وزیراعظم بیجنگ میں پاک-چین سفارتی تعلقات کی 75 ویں سالگرہ کے موقع پر منعقدہ خصوصی تقریب میں بھی شرکت کریں گے، جس کا اہتمام چائنیز پیپلز ایسوسی ایشن فار فرینڈشپ ود فارن کنٹریز کی جانب سے کیا جا رہا ہے۔
توقع ظاہر کی جا رہی ہے کہ وزیراعظم کے اس دورے سے دونوں ممالک کے درمیان سیاسی اعتماد، اسٹریٹجک ہم آہنگی اور اقتصادی تعاون کو مزید فروغ حاصل ہوگا، جبکہ پاک چین دوستی کے دیرینہ تعلقات مزید مضبوط ہوں گے۔
By 
