عید پر گیس کتنے ٹائم کیلئے ملے گی؟نیا شیڈول جاری

کراچی کے شہریوں کے لیے خوشخبری ہے کہ عید الاضحیٰ کے ایام میں گھریلو اور تجارتی صارفین کو گیس کی بلا تعطل فراہمی یقینی بنانے کا فیصلہ کیا گیا ہے، جس کے تحت مخصوص اوقات کے علاوہ عام دنوں کی نسبت گیس کی بہتر دستیابی برقرار رکھی جائے گی۔

سوئی سدرن گیس کمپنی نے عید الاضحیٰ کے دوران گیس کی فراہمی کا خصوصی شیڈول جاری کر دیا ہے جس کا مقصد شہریوں کو قربانی کے دنوں میں کھانا پکانے اور دیگر گھریلو ضروریات میں سہولت فراہم کرنا ہے۔

جاری کردہ شیڈول کے مطابق منگل 26 مئی چاند رات کے موقع پر گیس کی فراہمی رات12 بجے عارضی طور پر بند کی جائے گی اور پھر رات 3 بجے دوبارہ بحال کر دی جائے گی تاکہ نظام میں ضروری بہتری اور دباؤ کو متوازن رکھا جا سکے۔

یہ بھی پڑھیں :پنجاب اور خیبر پختونخوا کیلئے گیس لوڈشیڈنگ کا نیا شیڈول جاری

عید کے پہلے دن اور دوسرے دن گیس کی فراہمی صبح ساڑھے7 بجے سے رات12 بجے تک بلا تعطل جاری رہے گی۔ اس دوران گھریلو صارفین کو کھانا پکانے اور دیگر ضروری امور میں سہولت حاصل رہے گی جبکہ تجارتی صارفین بھی اس سہولت سے مستفید ہو سکیں گے۔

جمعہ کے دن بھی گیس کی فراہمی کے حوالے سے خصوصی انتظامات کیے گئے ہیں جس کے تحت پورے دن کے دوران گیس کی لوڈشیڈنگ نہیں کی جائے گی، تاہم رات دس بجے سے صبح سات بجے تک گیس کی فراہمی عارضی طور پر معطل رہے گی تاکہ نظام کو معمول پر لایا جا سکے۔

ہفتہ تیس مئی سے گیس کی فراہمی دوبارہ پرانے شیڈول کے مطابق شروع ہو جائے گی اور معمول کے مطابق اوقات میں ہی گیس دستیاب ہوگی۔ اس کے بعد معمول کی لوڈشیڈنگ پالیسی دوبارہ نافذ کر دی جائے گی جس کے تحت صرف مخصوص اوقات میں ہی گیس فراہم کی جائے گی۔

حکام کے مطابق عید کے دنوں میں اس خصوصی انتظام کا مقصد شہریوں کو زیادہ سے زیادہ سہولت فراہم کرنا اور اہم مذہبی موقع پر عوامی مشکلات کو کم کرنا ہے۔ شہریوں سے اپیل کی گئی ہے کہ وہ گیس کے استعمال میں احتیاط کریں اور غیر ضروری ضیاع سے گریز کریں تاکہ نظام بہتر انداز میں چلایا جا سکے۔