بیلاروس کے چیف آف جنرل اسٹاف کا ایئر ہیڈکوارٹرز کا دورہ، علاقائی سیکیورٹی، دفاعی تعاون اور مشترکہ تربیتی پروگرامز پر تبادلہ خیال

بیلاروس کے اعلیٰ سطحی دفاعی وفد نے میجر جنرل موراویئیکو پاول نکولائیووچ کی قیادت میں اسلام آباد میں ایئر ہیڈ کوارٹرز کا دورہ کیا، جہاں وفد نے چیف آف دی ایئر اسٹاف ایئر چیف مارشل ظہیر احمد بابر سدھو، این آئی (ایم)، ایچ جے سے ملاقات کی۔

میجر جنرل موراویئیکو پاول نکولائیووچ بیلاروس کی مسلح افواج کے چیف آف جنرل اسٹاف اور فرسٹ ڈپٹی وزیر دفاع ہیں۔ ملاقات کے دوران باہمی دلچسپی کے امور، خطے کی سیکیورٹی صورتحال، دفاعی تعاون اور دونوں ممالک کی افواج کے درمیان مزید تعاون بڑھانے کے امکانات پر تبادلہ خیال کیا گیا۔

ایئر چیف مارشل ظہیر احمد بابر سدھو نے پاکستان ایئر فورس کی جانب سے دونوں ممالک کے درمیان دفاعی تعلقات مزید مضبوط بنانے کے عزم کا اعادہ کیا۔

تعاون بڑھانے پر اتفاق

پاک فضائیہ کے سربراہ نے مشترکہ تربیتی پروگرامز، مشقوں، ٹیکنالوجی کے تبادلے اور دفاعی صنعت میں شراکت داری کے ذریعے تعاون کو وسعت دینے کی اہمیت پر زور دیا۔

انہوں نے کہا کہ پاکستان اور بیلاروس کے درمیان دفاعی شعبے میں تعاون کو مزید فروغ دینے کے وسیع مواقع موجود ہیں۔

یہ بھی پڑھیں: دنیا کی 100 بہترین یونیورسٹیوں نے پاکستانی طلبہ کیلئے دروازے کھول دیے، مفت تعلیم کا اعلان

بیلاروس وفد کی تعریف

بیلاروسی دفاعی وفد کے سربراہ نے پاکستان ایئر فورس کی پیشہ ورانہ صلاحیتوں، آپریشنل تیاریوں، تکنیکی ترقی اور خود انحصاری کے اقدامات کو سراہا۔

انہوں نے دفاعی شعبے میں پاکستان کے ساتھ دوطرفہ تعاون کو مزید بڑھانے کے لیے بیلاروس کے عزم کا اظہار کیا۔

تعلقات مضبوط بنانے کا عزم

ملاقات اس عزم کا اظہار ہے کہ پاکستان اور بیلاروس باہمی دلچسپی کے شعبوں میں تعاون کو مزید فروغ دیتے ہوئے دفاعی تعلقات کو نئی وسعت دیں گے۔