ماڈل ایان کو کن لوگوں سے خطرہ تھا؟ جیا علی نے برسوں بعد خاموشی توڑ دی

پاکستانی اداکارہ اور ماڈل جیا علی نے اپنے حالیہ انٹرویو میں سابق سپر ماڈل ایان علی سے متعلق ایک اہم اور متنازع معاملے پر کھل کر گفتگو کی ہے۔

جیا علی طویل عرصے سے شوبز اور فیشن انڈسٹری سے وابستہ ہیں اور کئی برس تک پاکستان کے فیشن منظرنامے میں نمایاں مقام رکھتی رہی ہیں۔ اپنے تازہ انٹرویو میں انہوں نے اپنے ایک سابق کم عمر ساتھی کے طور پر ایان علی کا ذکر کرتے ہوئے ان کے کیریئر اور بعد میں سامنے آنے والے منی لانڈرنگ کیس پر بات کی۔

ایان علی ایک وقت میں پاکستان کی مقبول سپر ماڈلز میں شمار ہوتی تھیں۔ ان کی خوبصورتی اور ماڈلنگ کے باعث وہ مختلف معروف برانڈز کے اشتہارات، بل بورڈز اور فیشن شوز میں نمایاں نظر آتی تھیں۔

یہ بھی پڑھیں:سہیل خان اچانک اتنے کمزور کیوں ہوگئے،حقیقت کیا ہے؟

تاہم 2015 میں کرنسی اسمگلنگ کے ایک مقدمے میں ان کی گرفتاری کے بعد معاملہ قومی سطح پر خبروں کا موضوع بن گیا اور ان کی عدالت میں پیشیاں بھی طویل عرصے تک میڈیا کی توجہ کا مرکز رہیں۔

جیا علی نے ماضی کو یاد کرتے ہوئے دعویٰ کیا کہ فیشن انڈسٹری میں کام کے دوران وہ ایان علی کو مختلف فائلیں منتقل کرتے ہوئے دیکھا کرتی تھیں۔ ان کے مطابق ایان علی بہت کم عمر تھیں، لیکن اس کے باوجود انہیں بڑے برانڈز کے اشتہارات اور بل بورڈز پر مسلسل دیکھا جاتا تھا۔

اداکارہ نے یہ بھی دعویٰ کیا کہ مہنگی گاڑیاں ایان علی کو فوٹو شوٹس سے لینے اور چھوڑنے کے لیے آتی تھیں۔ جیا علی کے مطابق اس وقت بھی انہیں صورتحال کچھ غیر معمولی محسوس ہوتی تھی۔

یہ بھی پڑھیں:لاہور میں سلمان خان کی آمد پر عام تعطیل؟ مصطفیٰ زاہد نے بڑی بات کہہ دی

جیا علی نے بتایا کہ انہوں نے مبینہ طور پر ایان علی کو براہ راست خبردار بھی کیا تھا کہ کچھ لوگ انہیں اپنے مفاد کے لیے استعمال کرسکتے ہیں اور بعد میں چھوڑ دیں گے۔انہوں نے کہا کہ معاشرے کو صرف ان خواتین کو مورد الزام ٹھہرانے کے بجائے ان لوگوں سے بھی سوال کرنا چاہیے جو کم عمر خواتین کو اپنے مقاصد کے لیے استعمال کرتے ہیں۔

جیا علی کے مطابق عوام کو یہ سوچنے کی ضرورت ہے کہ کسی تنازع میں صرف سامنے آنے والی خاتون کو قصوروار قرار دینا کافی نہیں۔ ان کا کہنا تھا کہ ان افراد کو بھی جواب دہ ہونا چاہیے جو کسی شخص کی شہرت، کم عمری یا مجبوری سے فائدہ اٹھاتے ہیں۔

ایان علی کا کیس کئی برس تک پاکستانی میڈیا میں زیر بحث رہا، تاہم جیا علی کے حالیہ بیان نے ایک بار پھر اس پرانی بحث کو سوشل میڈیا پر زندہ کردیا ہے۔ واضح رہے کہ جیا علی کے یہ خیالات ان کے حالیہ انٹرویو میں سامنے آئے ہیں، جبکہ ان کے بیان کردہ بعض واقعات ان کا ذاتی مشاہدہ اور مؤقف ہیں۔