لاہور میں سلمان خان کی آمد پر عام تعطیل؟ مصطفیٰ زاہد نے بڑی بات کہہ دی

پاکستان کے معروف گلوکار مصطفیٰ زاہد نے بالی ووڈ کے سپر اسٹار سلمان خان کی پاکستان میں مقبولیت کا ذکر کرتے ہوئے دلچسپ تبصرہ کیا ہے۔

حال ہی میں ایک بھارتی صحافی کو دیے گئے انٹرویو میں مصطفیٰ زاہد نے پاکستان اور بھارت میں فنکاروں کی مقبولیت اور دونوں ممالک کے درمیان سیاسی کشیدگی کے باوجود فن سے وابستہ شخصیات کے لیے عوامی محبت پر گفتگو کی۔

سلمان خان کی پاکستان میں غیر معمولی مقبولیت کا ذکر کرتے ہوئے مصطفیٰ زاہد نے مسکراتے ہوئے کہا کہ اگر سلمان خان لاہور آ جائیں تو شہر میں عام تعطیل کا اعلان کرنا پڑے گا۔

یہ بھی پڑھیں:نمرہ خان کے شوہر پر فضاعلی برہم ، کھری کھری سنا دیں

مصطفیٰ زاہد کا کہنا تھا کہ پاکستان میں سلمان خان کے مداحوں کی بڑی تعداد موجود ہے اور اگر وہ کبھی لاہور کا دورہ کریں تو ان کی ایک جھلک دیکھنے کے لیے بڑی تعداد میں لوگ سڑکوں پر نکل آئیں گے۔ گلوکار نے اس موقع پر پاکستان اور بھارت کے درمیان سیاسی تعلقات اور فنکاروں کی مقبولیت کے حوالے سے بھی اپنی رائے کا اظہار کیا۔

ان کا کہنا تھا کہ دونوں ممالک کے درمیان سیاسی اختلافات اپنی جگہ، لیکن فن اور فنکاروں سے لوگوں کی محبت کو سیاسی صورتحال ہمیشہ تبدیل نہیں کرسکتی۔ عوام جس فنکار کو پسند کرتے ہیں، ان کی محبت برقرار رہتی ہے۔

یہ بھی پڑھیں:فواد خان کی نئی تصاویر نے سوشل میڈیا پر دھوم مچا دی، اہلیہ کے ہمراہ دلکش انداز

مصطفیٰ زاہد نے کہا کہ سیاست اور فن کو الگ دیکھنا چاہیے، کیونکہ موسیقی اور فن لوگوں کو ایک دوسرے کے قریب لانے کی صلاحیت رکھتے ہیں۔ ان کے مطابق سرحدوں کے دونوں جانب فنکاروں کے لیے موجود محبت اس بات کا ثبوت ہے کہ فن کی اپنی ایک الگ طاقت ہے۔

واضح رہے کہ مصطفیٰ زاہد خود بھی بالی ووڈ میں اپنی آواز کا جادو جگا چکے ہیں۔ انہوں نے ’آوارہ پن‘ اور ’ایک ولن‘ سمیت متعدد بھارتی فلموں کے لیے گانے گائے ہیں، جنہیں پاکستان اور بھارت سمیت دیگر ممالک میں بھی پسند کیا گیا۔

مصطفیٰ زاہد کا سلمان خان کے حوالے سے یہ دلچسپ تبصرہ سامنے آنے کے بعد سوشل میڈیا پر بھی گفتگو کا موضوع بن سکتا ہے، خصوصاً اس لیے کہ سلمان خان کا شمار ان بھارتی اداکاروں میں ہوتا ہے جن کی پاکستان میں بھی بڑی فین فالوونگ موجود ہے۔