دنیا کی بلند ترین عمارت پر پاکستان کا رنگ، برج خلیفہ روشن ہوگیا

پاکستان کے 79ویں یوم آزادی کے موقع پر دبئی کا عالمی شہرت یافتہ برج خلیفہ سبز اور سفید روشنیوں سے جگمگا اٹھا، جس نے پاکستانیوں کے لیے جشن آزادی کے موقع پر ایک خوبصورت اور یادگار منظر پیش کیا۔

14 اگست کو دنیا کی بلند ترین عمارت پر پاکستان کے قومی رنگ نمایاں کیے گئے۔ سبز اور سفید روشنیوں میں نہایا برج خلیفہ دبئی کے آسمان پر پاکستان سے اظہار یکجہتی کی علامت بن گیا۔ برج خلیفہ پر پاکستانی پرچم کے رنگوں کی روشنی نے نہ صرف دبئی میں موجود پاکستانیوں کی توجہ حاصل کی بلکہ سوشل میڈیا پر بھی اس خوبصورت منظر کی تصاویر اور ویڈیوز تیزی سے گردش کرنے لگیں۔

یہ بھی پڑھیں:پاکستان کا 79واں یوم آزادی ، گوگل نے بھی ڈوڈل پر سبز ہلالی پرچم لہرا دیا

پاکستانی شہریوں نے برج خلیفہ کو قومی رنگوں میں روشن کیے جانے پر خوشی کا اظہار کیا اور اسے ملک کے لیے ایک قابل فخر لمحہ قرار دیا۔واضح رہے کہ دبئی کی اس معروف عمارت کو ماضی میں بھی پاکستان کے یوم آزادی کے موقع پر سبز اور سفید روشنیوں سے سجایا جاتا رہا ہے، تاہم ہر سال یہ منظر پاکستانی کمیونٹی کے لیے خصوصی جذبات کا باعث بنتا ہے۔

دنیا کی بلند ترین عمارت پر پاکستان کے قومی رنگوں کا روشن ہونا 14 اگست کی خوشیوں میں ایک خوبصورت اضافہ بن گیا اور بیرون ملک مقیم پاکستانیوں کے لیے بھی وطن سے محبت کے اظہار کا ایک یادگار لمحہ ثابت ہوا۔