مودی مخالف نعرے لندن تک گونج اٹھے، بھارتی نوجوانوں کا ہائی کمیشن کے باہر احتجاج

بھارتی وزیر اعظم نریندر مودی کی پالیسیوں کے خلاف احتجاج کی آواز لندن تک پہنچ گئی، جہاں بھارتی نوجوانوں نے بھارتی ہائی کمیشن کے باہر مظاہرہ کرتے ہوئے حکومت کے خلاف نعرے لگائے اور اپنے غصے کا اظہار کیا۔

بھارتی جریدے انڈیا ٹوڈے کے مطابق لندن میں یہ احتجاج اسٹوڈنٹ فیڈریشن آف انڈیا کے زیر اہتمام کیا گیا۔ مظاہرین نے مودی حکومت کی پالیسیوں اور طویل عرصے سے اقتدار میں رہنے پر تنقید کی۔

سوشل میڈیا پلیٹ فارم ایکس پر گردش کرنے والی ویڈیو میں مظاہرین کو بھارتی ہائی کمیشن کے باہر نعرے لگاتے دیکھا جا سکتا ہے۔ احتجاج کے دوران بعض نوجوانوں نے بندر کا مجسمہ بھی اٹھا رکھا تھا اور مودی کے لیے طنزیہ نعرے لگائے،مظاہرین کی جانب سے ’’چھپن انچ کی چھاتی والا چھوٹا بندر‘‘ جیسے الفاظ استعمال کیے گئے، جو بھارتی وزیر اعظم پر سیاسی طنز کے طور پر سامنے آئے۔

یہ بھی پڑھیں :مودی سرکار کے لیے نئی پریشانی ،پہلے کاکروچ اب مکھی جنتا پارٹی کی انٹری

احتجاج میں شریک نوجوانوں نے مودی حکومت کی پالیسیوں پر اپنے تحفظات کا اظہار کیا۔ اس مظاہرے سے یہ بات بھی نمایاں ہوئی کہ بھارتی حکومت کے بارے میں سیاسی اختلافات اور تنقیدی آوازیں بھارت سے باہر مقیم نوجوانوں میں بھی موجود ہیں۔

سیاسی مبصرین کے مطابق مودی حکومت کی پالیسیوں پر تنقید اور بیرون ملک احتجاج بھارتی سیاست سے متعلق جاری بحث کا حصہ ہیں۔ تاہم لندن میں ہونے والا یہ مظاہرہ شرکا کے مؤقف اور ان کے سیاسی تحفظات کی عکاسی کرتا ہے، اسے تمام بھارتی نوجوانوں کی رائے قرار نہیں دیا جا سکتا۔