فضائی سفر میں ایک دلچسپ واقعہ سامنے آیا ہے، جہاں کینیا سے 50 سے زائد اعلیٰ نسل کی دودھ دینے والی گائیں خصوصی کارگو طیارے کے ذریعے نائیجیریا پہنچائی گئیں۔ اس منفرد آپریشن کو کینیا ایئرویز نے مزاحیہ انداز میں ’وی آئی کیٹل‘ کا نام دیا۔
عام طور پر کارگو طیاروں کے ذریعے سامان، مشینری اور دیگر اشیا منتقل کی جاتی ہیں، لیکن اس بار ایک خصوصی پرواز میں گایوں کو ان کی منزل تک پہنچانے کا انتظام کیا گیا۔ اس مقصد کے لیے ایک صارف نے پورا کارگو طیارہ چارٹر کیا تھا۔
میڈیا رپورٹ کے مطابق گایوں کو کینیا کے الدورت ایئرپورٹ سے خصوصی دھاتی کریٹس میں طیارے پر سوار کیا گیا اور وہاں سے نائیجیریا کے شہر لاگوس منتقل کیا گیا۔
کینیا ایئرویز کارگو نے سوشل میڈیا پر اس آپریشن کی تصدیق کرتے ہوئے دلچسپ انداز میں لکھا کہ راستہ دے دیا جائے، کیونکہ ان کے وی آئی پی مویشی سرسبز چراگاہوں کی تلاش میں فضائی سفر کر رہے ہیں۔
ایئرلائن نے اس خصوصی آپریشن میں حصہ لینے والے عملے اور اپنی لائیو اینیمل ٹرانسپورٹ سروس پر اعتماد کرنے والے صارف کا بھی شکریہ ادا کیا۔
میڈیا رپورٹ کے مطابق ان گایوں کو کینیا کے علاقے اواسن گیشو کے چھوٹے فارمز سے حاصل کیا گیا تھا۔ یہ علاقہ اعلیٰ نسل کے مویشیوں کی افزائش کے لیے مشہور ہے۔
منتقل کی جانے والی گایوں میں آئیرشائر نسل کی حاملہ مادہ گائیں بھی شامل تھیں۔ یہ نسل دودھ کی پیداوار اور مویشیوں کی افزائش کے حوالے سے اہم سمجھی جاتی ہے۔
گایوں کو نائیجیریا منتقل کرنے کا مقصد کیا ہے؟
اس منفرد فضائی آپریشن کا بنیادی مقصد نائیجیریا میں دودھ کی پیداوار بڑھانے اور مقامی ڈیری فارمنگ کو فروغ دینے میں مدد فراہم کرنا بتایا گیا ہے۔
اعلیٰ نسل کے مویشیوں کی منتقلی سے مقامی کسانوں کو دودھ کی پیداوار بہتر بنانے اور مویشیوں کی افزائش کے مواقع مل سکتے ہیں۔
یہ واقعہ ظاہر کرتا ہے کہ فضائی کارگو سروسز صرف سامان کی ترسیل تک محدود نہیں، بلکہ جانوروں کو محفوظ طریقے سے ایک ملک سے دوسرے ملک پہنچانے کے لیے بھی استعمال کی جا سکتی ہیں۔
By 
