مہنگائی کی رفتار کو بریک لگ گئی، ادارہ شماریات کے تازہ اعدادوشمار سامنے آگئے

ملک میں مہنگائی کی سالانہ شرح میں کمی ریکارڈ کی گئی ہے، اکتوبر 2026 کے دوران صارف قیمتوں کے اشاریے (سی پی آئی) کے مطابق مہنگائی کی شرح 9.6 فیصد رہی، جو ستمبر میں 10.3 فیصد تھی۔

پاکستان ادارہ شماریات (پی بی ایس) کی جانب سے پیر کو جاری کردہ اعدادوشمار کے مطابق اکتوبر 2025 میں مہنگائی کی سالانہ شرح 6.2 فیصد ریکارڈ کی گئی تھی۔

اعدادوشمار کے مطابق ماہانہ بنیادوں پر اکتوبر 2026 میں مہنگائی کی شرح میں 1.1 فیصد اضافہ ہوا، جبکہ ستمبر میں یہ اضافہ 1.3 فیصد اور اکتوبر 2025 میں 1.7 فیصد ریکارڈ کیا گیا تھا۔

شہری علاقوں میں سالانہ بنیادوں پر مہنگائی کی شرح اکتوبر میں 9.5 فیصد رہی، جو ستمبر میں 10.1 فیصد اور گزشتہ سال اکتوبر میں 6 فیصد تھی۔

شہری علاقوں میں ماہانہ بنیادوں پر مہنگائی میں 0.8 فیصد اضافہ ریکارڈ کیا گیا، جبکہ ستمبر میں یہ شرح 1.3 فیصد اور اکتوبر 2025 میں 1.4 فیصد تھی۔

دوسری جانب دیہی علاقوں میں سالانہ بنیادوں پر مہنگائی کی شرح اکتوبر 2026 میں 9.8 فیصد رہی، جو ستمبر میں 10.5 فیصد اور اکتوبر 2025 میں 6.6 فیصد ریکارڈ کی گئی تھی۔

دیہی علاقوں میں ماہانہ بنیادوں پر مہنگائی میں 1.5 فیصد اضافہ ہوا، جبکہ گزشتہ ماہ یہ اضافہ 1.2 فیصد اور اکتوبر 2025 میں 2.1 فیصد رہا تھا۔

ادارہ شماریات کے مطابق رواں مالی سال 2026-27 کے ابتدائی چار ماہ کے دوران مہنگائی کی مجموعی اوسط شرح 10.05 فیصد رہی، جبکہ گزشتہ مالی سال کی اسی مدت میں یہ شرح 4.79 فیصد تھی۔

وزارت خزانہ نے اپنی تازہ اقتصادی آؤٹ لک رپورٹ میں اکتوبر 2026 کے دوران مہنگائی کی شرح 9.5 سے 10.5 فیصد کے درمیان رہنے کی پیش گوئی کی تھی۔ وزارت کے مطابق عالمی رجحانات کے ساتھ ملک میں توانائی اور اشیائے خورونوش کی بلند قیمتیں مہنگائی پر اثرانداز ہو رہی ہیں، تاہم رواں مالی سال کے دوران ملکی معیشت کے امکانات مثبت رہنے کی توقع ہے۔

دوسری جانب ملک کے نمایاں بروکریج اداروں نے اکتوبر میں مہنگائی کی شرح کم ہو کر 9 سے 9.5 فیصد کے درمیان آنے کی توقع ظاہر کی تھی۔ تاہم پیٹرولیم مصنوعات اور بجلی کی بڑھتی ہوئی قیمتوں کے باعث مہنگائی کا دباؤ برقرار رہنے اور اسٹیٹ بینک کے لیے آئندہ مانیٹری پالیسی سے متعلق فیصلوں میں مشکلات پیدا ہونے کا خدشہ ظاہر کیا گیا ہے۔