سعودی وزیر خارجہ کے قطر اور مصر کے ہم منصبوں سے رابطے، علاقائی صورتحال پر تبادلہ خیال

سعودی عرب نے خطے میں بڑھتی ہوئی کشیدگی اور امن و استحکام کی صورتحال پر قطر اور مصر کے ساتھ سفارتی رابطوں کا سلسلہ جاری رکھتے ہوئے اہم مشاورت کی ہے۔ سعودی وزیر خارجہ شہزادہ فیصل بن فرحان نے دونوں ممالک کے وزرائے خارجہ سے الگ الگ ٹیلی فونک گفتگو کی، جس میں علاقائی صورتحال اور کشیدگی میں کمی لانے کے لیے مشترکہ سفارتی کوششوں کا جائزہ لیا گیا۔

سعودی وزارت خارجہ کے مطابق شہزادہ فیصل بن فرحان نے قطر کے وزیراعظم اور وزیر خارجہ شیخ محمد بن عبدالرحمان آل ثانی سے رابطہ کیا۔ گفتگو کے دوران خطے میں ہونے والی تازہ پیش رفت، موجودہ صورتحال اور علاقائی امن کو درپیش چیلنجز پر تبادلہ خیال کیا گیا۔

دونوں رہنماؤں نے اس بات پر بھی مشاورت کی کہ خطے میں کشیدگی کو مزید بڑھنے سے روکنے اور امن و استحکام برقرار رکھنے کے لیے سفارتی سطح پر مشترکہ کوششیں جاری رکھنا ضروری ہے۔

سعودی وزیر خارجہ نے اس کے بعد مصر کے وزیر خارجہ بدر عبدالعاطی سے بھی ٹیلی فونک رابطہ کیا۔ اس گفتگو میں بھی مشرق وسطیٰ کی مجموعی صورتحال، علاقائی معاملات اور کشیدگی میں کمی کے لیے جاری سفارتی سرگرمیوں پر تبادلہ خیال کیا گیا۔

سعودی وزارت خارجہ کے مطابق دونوں رابطوں میں علاقائی معاملات پر مسلسل مشاورت اور سفارتی تعاون کو برقرار رکھنے کی اہمیت پر زور دیا گیا، جبکہ خطے میں امن و استحکام کے فروغ کے لیے مشترکہ کوششیں جاری رکھنے پر بھی بات ہوئی۔