پاکستان میں توانائی کے شعبے سے بڑی خوشخبری سامنے آگئی، سندھ کے ضلع خیرپور میں تیل اور گیس کے نئے ذخائر دریافت ہوئے ہیں، جہاں ابتدائی آزمائشی پیداوار کے دوران یومیہ ایک کروڑ 28 لاکھ اسٹینڈرڈ مکعب فٹ گیس اور 175 بیرل کنڈینسیٹ حاصل ہوا ہے۔ اس اہم دریافت سے ملک میں توانائی کی مقامی ضروریات پوری کرنے اور درآمدی ایندھن پر انحصار کم کرنے میں مدد ملنے کی توقع ہے۔
آئل اینڈ گیس ڈیولپمنٹ کمپنی لمیٹڈ (او جی ڈی سی ایل) نے نئی دریافت کی تصدیق کرتے ہوئے پاکستان اسٹاک ایکسچینج کو باضابطہ خط کے ذریعے آگاہ کردیا ہے۔ کمپنی کے مطابق تیل اور گیس کی یہ دریافت ضلع خیرپور میں واقع بترسم نارتھ ویسٹ ون کے تلاش کنویں سے ہوئی، جہاں لوئر گورو فارمیشن کی زیرزمین تہوں میں گیس اور کنڈینسیٹ کے ذخائر کی موجودگی کی تصدیق ہوئی ہے
او جی ڈی سی ایل کی جانب سے جاری تفصیلات کے مطابق بترسم نارتھ ویسٹ ون کنویں کی کھدائی 21 اگست 2026 کو شروع کی گئی تھی، جسے زمین کی سطح سے 3 ہزار 732 میٹر گہرائی تک کھودا گیا۔ کھدائی مکمل ہونے کے بعد زیرزمین چٹانی تہوں کے تجزیے اور خصوصی پیداواری ٹیسٹ کیے گئے، جن کے نتیجے میں گیس اور کنڈینسیٹ کی موجودگی ثابت ہوئی۔
او جی ڈی سی ایل نے بتایا کہ اس منصوبے میں کمپنی کے 95 فیصد ورکنگ حصص ہیں جبکہ باقی 5 فیصد حصص گورنمنٹ ہولڈنگز پرائیویٹ لمیٹڈ کے پاس ہیں۔ کمپنی کنویں کو جلد از جلد قومی گیس جمع کرنے اور ترسیل کے نظام سے منسلک کرنے کے لیے ضروری اقدامات تیز کررہی ہے تاکہ دریافت شدہ گیس کو تجارتی بنیادوں پر استعمال میں لایا جاسکے۔
کمپنی کا کہنا ہے کہ نئی دریافت سے او جی ڈی سی ایل کے ہائیڈروکاربن ذخائر میں اضافہ ہوگا اور پاکستان کی توانائی کی ضروریات پوری کرنے میں مدد ملے گی۔ مقامی گیس کی پیداوار بڑھنے سے طلب اور رسد کے درمیان موجود فرق کم کرنے میں بھی معاونت مل سکتی ہے۔
توانائی کے شعبے میں اس پیش رفت کو اہم قرار دیا جارہا ہے، تاہم کنویں سے باقاعدہ تجارتی پیداوار کے آغاز اور مجموعی قابلِ حصول ذخائر کی حتمی مقدار کا تعین مزید تکنیکی جائزوں اور متعلقہ انتظامات کی تکمیل کے بعد ہوگا۔ توقع ہے کہ نئے کنویں کی قومی نظام سے منسلک ہونے کے بعد ملکی گیس کی فراہمی میں اضافے کی راہ ہموار ہوگی۔
