عوامی منبر پر امریکا دشمنی، بند کمروں میں وزیراعظم بننے کی منتیں، فضل الرحمان کا دہرا روپ ایک بار پھر خبروں میں زیر گردش؟

جمعیت علمائے اسلام (ف) کے سربراہ فضل الرحمن کی سیاست میں عوام میں امریکا کی مخالفت اور پس پردہ بیرونی فنڈنگ و امریکی حمایت کی تلاش کے سنگین تضادات نے ملک کے سیاسی افق پر نئے سوالات اٹھا دیے ہیں۔

فضل الرحمن اور لیبیا کے سابق حکمران معمر قذافی کے درمیان تعلقات کا معاملہ دہائیوں پر محیط ایک اہم سیاسی بحث کا ذریعہ رہا ہے۔

سال 2002 میں معروف امریکی صحافی میری این ویور نے عالمی شہرت یافتہ نشریاتی ادارے ’پی بی ایس‘ کے تحقیقی پروگرام ’فرنٹ لائن‘ میں سنسنی خیز انکشافات کیے تھے کہ جمعیت علماء اسلام اور لیبیا کی قذافی حکومت کے مابین گہرے سفارتی و مالی تعلقات قائم تھے۔

یہ بھی پڑھیں:ایک ڈرون فوٹیج پردھمکیاں کیوں؟ جو ویڈیو استعمال ہوئی وہ اوپن سورس ہے، ہم نے نہیں بنائی، مصور حسین عباسی کا جمعیت علمائے اسلام (ف) کی سوشل میڈیا مہم پردو ٹوک جواب

اس رپورٹ کے مطابق فضل الرحمان کی جماعت کو بیرون ملک سے مسلسل مالی معاونت فراہم کی جاتی رہی، جس نے پاکستانی سیاست میں مذہبی و قوم پرست بیانیے کی اصلیت پر سوالیہ نشان ثبت کر دیے تھے۔

الیکشن کمیشن میں فارن فنڈنگ کیس اور الٹیمیٹم

اس تاریخی تنازع نے جنوری 2021 میں اس وقت ایک انتہائی ڈرامائی صورت اختیار کر لی جب جے یو آئی کے سابق مرکزی ترجمان حافظ حسین احمد کا ایک متنازع اور دھماکے دار انٹرویو الیکشن کمیشن آف پاکستان میں جمع کرایا گیا۔

پاکستان تحریک انصاف کے سرکردہ رہنما فرخ حبیب نے فارن فنڈنگ کی باضابطہ درخواست دائر کرتے ہوئے عدالت کے سامنے الزامات کے انبار لگا دیے کہ فضل الرحمان اور ان کی جماعت نے نہ صرف لیبیا بلکہ عراق کی حکومتی شخصیتوں سے بھی بھاری مالی امداد اور فنڈز حاصل کیے، جس کا کوئی باقاعدہ حساب الیکشن کمیشن میں جمع نہیں کرایا گیا تھا۔

وکی لیکس کی 2007 کی سنسنی خیز سفارتی کیبل

عوام کے سامنے اینٹی امریکا بیانیہ اور امریکی سفارت کاروں کے ساتھ خفیہ سازباز کی حقیقت اس وقت کھل کر سامنے آئی جب وکی لیکس کی سن 2007 کی سفارتی دائرہ کار کی کیبل منظرِ عام پر آئی۔

اس باضابطہ کیبل کے مطابق  فضل الرحمان نے اسلام آباد میں اس وقت کی امریکی سفیر این پیٹرسن سے ایک خاص ملاقات کی، جس میں انہوں نے یہ واضح اور صریح خواہش ظاہر کی کہ اگر وہ ملک کے وزیراعظم بنتے ہیں تو انہیں واشنگٹن کی طرف سے مکمل سیاسی حمایت اور آشیرباد ملنی چاہیے۔

یہ انکشاف اس گہرے خلیج کو ننگا کرتا ہے جو عوامی اسٹیج کی تقریروں اور بند رومز کی سودے بازیوں کے درمیان موجود ہے۔

سیاسی منافقت، بیرونی فنڈنگ اور احتساب کا کٹہرہ

پاکستانی سیاست کی تاریک راہوں پر یہ تمام شواہد اس کڑوے سچ کو عیاں کرتے ہیں کہ سیاست میں نظریات اور نعرے صرف عوام کو دھوکہ دینے اور اقتدار کی سیڑھی چڑھنے کے لیے استعمال کیے جاتے ہیں۔

مزید پڑھیں:فضل الرحمان کا طلبہ کو ڈھال بنا کر قانون کے راستے میں رکاوٹ ڈالنے کی کوشش، مفتی محمود مرکز کی سیکیورٹی انصار السلام کے حوالے

جب بھی مذہبی قیادت کے دعویدار عوامی جلسوں میں امریکا مخالف جذبات ابھار کر سیاسی فائدہ سمیٹتے ہیں اور دوسری طرف پس پردہ امریکی سفیروں سے اقتدار کی التجا کرتے ہیں، تو یہ عوامی اعتماد کے ساتھ ایک کھُلا مذاق بن جاتا ہے۔

اب وقت کی اہم ضرورت ہے کہ محض شعلہ بیانیوں سے ہٹ کر بیرونی حکومتوں سے ملنے والی فنڈنگ اور پوشیدہ سفارتی جوڑ توڑ کا شفاف حساب عوام کے سامنے لایا جائے۔