نئے صوبوں کے قیام کیلئے ریفرنڈم ہوگا،دسمبر کا مہینہ انتہائی اہم ہے،مصطفیٰ کمال

 متحدہ قومی موومنٹ پاکستان کے رہنما مصطفیٰ کمال نے کہا ہے کہ ملک میں نئے صوبوں کے قیام کے لیے ریفرنڈم ہوگا اور دسمبر کا مہینہ اس حوالے سے انتہائی اہم ثابت ہوگا۔ ان کا کہنا ہے کہ پاکستان ایک اہم اور فیصلہ کن تاریخی موڑ پر کھڑا ہے اور ماضی میں دیکھے گئے خواب اب حقیقت کا روپ دھار رہے ہیں۔

کراچی میں ڈسٹرکٹ سینٹرل کے ذمہ داران اور کارکنان سے خطاب کرتے ہوئے مصطفیٰ کمال نے کہا کہ نئے صوبوں کے قیام کی مخالفت کرنے والے عناصر شہر اور صوبے کی مختلف لسانی اکائیوں کو آپس میں لڑانا چاہتے ہیں، تاہم تمام زبانیں بولنے والوں کو متحد رکھنا وقت کی ضرورت ہے۔

انہوں نے کہا کہ ملک میں جاگیردارانہ، وڈیرانہ اور سرمایہ دارانہ نظام کو دفن کرنے کا وقت آگیا ہے۔ پیپلز پارٹی پورے سندھ کی نمائندہ جماعت نہیں جبکہ سندھی قوم پرست بھی سندھی قوم کے دشمن ہیں۔

یہ بھی پڑھیں :نئے صوبے بننے کے حوالے سےپیپلزپارٹی کاکوئی مسئلہ نہیں ہوگا ،غریدہ فاروقی

مصطفیٰ کمال نے کہا کہ مہاجروں کو اپنے دل بڑے کرنا ہوں گے اور تمام مذاہب و زبانیں بولنے والے افراد کو گلے لگانا ان کی ذمہ داری ہے۔ اندرون سندھ سمیت پاکستان بھر کے مظلوم طبقات نئے صوبوں کی تشکیل کے لیے کراچی والوں کی جانب دیکھ رہے ہیں۔

انہوں نے اپنے خطاب میں نئے صوبوں کے قیام کو ملک کے انتظامی اور سیاسی ڈھانچے میں تبدیلی سے جوڑتے ہوئے کہا کہ آنے والا دسمبر اس حوالے سے غیر معمولی اہمیت رکھتا ہے۔ تاہم ریفرنڈم کے انعقاد کی تاریخ، طریقہ کار اور مجوزہ صوبوں کی تفصیلات انہوں نے واضح نہیں کیں۔