بلاول بھٹو کی نئے صوبوں کی مخالفت پر خواجہ آصف کا جوابی وار، 18 سالہ سندھ حکومت کی کارکردگی اور سیاسی شراکت داری پر سوالات

بلاول بھٹو کی نئے صوبوں کی مخالفت پر خواجہ آصف کا جوابی وار، 18 سالہ سندھ حکومت کی کارکردگی اور سیاسی شراکت داری پر سوالات

چیئرمین پاکستان پیپلز پارٹی بلاول بھٹو زرداری کی جانب سے نئے صوبوں کے قیام کی مخالفت پر حکومتی رہنماؤں کی جوابی تنقید جاری ہے۔ وزیر دفاع خواجہ آصف نے بلاول بھٹو کو مخاطب کرتے ہوئے ان کی سیاسی شراکت داری، سندھ میں 18 سالہ حکمرانی اور طرزِ سیاست پر سوالات اٹھا دیے۔

خواجہ آصف نے سماجی رابطے کی ویب سائٹ ایکس پر اپنے بیان میں کہا کہ بلاول بھٹو 2020 سے کاروبارِ حکومت میں شریک ہیں، اس لیے انہیں موجودہ نظام پر تنقید کرتے ہوئے اپنی سیاسی ذمہ داریوں کو بھی سامنے رکھنا چاہیے۔ بلاول بھٹو نے سسٹم ری سیٹ کرنے کی بات کی، لیکن کوئی نظام اس وقت تک ری سیٹ نہیں ہوسکتا جب تک اسے عوامی تائید حاصل نہ ہو۔

وزیر دفاع کا کہنا تھا کہ سیاست دانوں کا احتساب کوئی نئی بات نہیں اور نہ ہی کوئی سیاست دان احتساب سے بالاتر ہے۔ بلاول بھٹو کی پریس کانفرنس دھواں دار ضرور تھی، لیکن سیاسی رہنماؤں کو عوام سے رجوع کرنے کے طریقہ کار کو چور دروازہ قرار نہیں دینا چاہیے۔ عوامی استصواب رائے اور پارلیمان کے اندر بحث و مباحثے پر کوئی پابندی نہیں، پارلیمنٹ کے ساتھ عوام کی رائے بھی معلوم کرلی جائے تو یہ زیادہ بہتر ہوگا۔

خواجہ آصف نے سندھ حکومت کی کارکردگی پر بھی سوالات اٹھاتے ہوئے کہا کہ بلاول بھٹو کے پاس گزشتہ 18 سال سے سندھ کی حکومت ہے، کیا سندھ جنت بن گیا ہے؟ کیا کراچی شہر کی حالت ایسی ہے کہ دنیا اس پر رشک کرتی ہے؟ انہوں نے پیپلز پارٹی کی صوبائی حکومت کی کارکردگی کو بھی سیاسی بحث کا حصہ بناتے ہوئے بلاول بھٹو سے جواب طلب کیا۔

وزیر دفاع نے مزید کہا کہ مسلم لیگ ن 2022 سے کاروبارِ حکومت میں پیپلز پارٹی کی شراکت دار ہے، لیکن سیاسی فائدہ پیپلز پارٹی کو اور نقصان مسلم لیگ ن یا پاکستان کو برداشت کرنا پڑتا ہے۔ انہوں نے سوال اٹھایا کہ حکومت میں شراکت داری کے باوجود بلاول بھٹو کو اس انداز میں تنقید اور دھمکی دینے کا کیا حق حاصل ہے؟

خواجہ آصف کا کہنا تھا کہ حکمرانوں کی طاقت عوام کی امانت ہوتی ہے، کسی کی ذاتی میراث نہیں۔ عوام کے حقوق کو صرف آئین کی کتاب تک محدود نہیں رکھنا چاہیے بلکہ انہیں عملی طور پر بھی یقینی بنانا ضروری ہے۔

اس سے قبل وزیراعظم کے مشیر برائے سیاسی امور رانا ثناء اللہ نے بھی بلاول بھٹو کی پریس کانفرنس پر ردعمل دیتے ہوئے کہا تھا کہ بلاول بھٹو سندھ کی تقسیم کے معاملے پر ڈسٹرب ہیں اور ان کی پریس کانفرنس تضادات سے بھری ہوئی تھی۔ انہوں نے سوال اٹھایا کہ اس معاملے پر اتنا سخت ردعمل دینے کی کیا ضرورت تھی؟

رانا ثناء اللہ کا کہنا تھا کہ ملک میں صوبوں کی تعداد 32 ہو یا 12، اس کا فیصلہ اتفاق رائے سے ہوگا۔ بلاول بھٹو کا یہ کہنا درست نہیں کہ پارلیمنٹ بااختیار نہیں، تاہم صوبوں کے قیام سے متعلق بحث ابھی کابینہ یا پارلیمنٹ میں نہیں ہوئی بلکہ سیمینارز کی سطح پر جاری ہے۔ جب یہ معاملہ پارلیمنٹ میں آئے گا تو تمام سیاسی جماعتوں کو اپنا مؤقف پیش کرنے کا موقع ملے گا۔

نئے صوبوں کے قیام پر پیپلز پارٹی اور حکومتی رہنماؤں کے درمیان لفظی جنگ شدت اختیار کرگئی ہے۔ ایک طرف بلاول بھٹو صوبوں کی تقسیم اور سیاسی نظام کے حوالے سے اپنے تحفظات کا اظہار کررہے ہیں تو دوسری جانب حکومتی رہنما سندھ میں پیپلز پارٹی کی طویل حکمرانی اور وفاقی حکومت میں اس کی شراکت داری کو تنقید کا نشانہ بنا رہے ہیں۔

editor

Related Articles