سندھ حکومت کا معاشی حب کے ساتھ ’سوتیلی ماں جیسا سلوک‘، ترقیاتی بجٹ میں اونٹ کے منہ میں زیرے کے برابر رقم مختص، وہ بھی غائب

سندھ حکومت کا معاشی حب کے ساتھ ’سوتیلی ماں جیسا سلوک‘، ترقیاتی بجٹ میں اونٹ کے منہ میں زیرے کے برابر رقم مختص، وہ بھی غائب

سندھ حکومت کے 720 ارب روپے کے مجموعی ترقیاتی بجٹ میں صوبے کی 37 فیصد آبادی رکھنے والے شہر کراچی کے میگا منصوبوں کے لیے 266 ارب روپے کے بجائے محض ساڑھے 6 ارب روپے مختص کیے جانے پر شدید عوامی و سیاسی بے چینی پائی جاتی ہے۔

کراچی کے شہریوں نے ملک کے سب سے بڑے معاشی مرکز کے ساتھ پیپلز پارٹی کی سندھ حکومت کی تاریخ کی بدترین مالی ناانصافی قرار دیتے ہوئے کہا ہے کہ کاغذوں میں رکھی گئی یہ معمولی رقم بھی تاحال شہر کو منتقل نہیں ہو سکی۔

سرکاری مردم شماری کے مستند اعداد و شمار کے مطابق، کراچی کی آبادی پورے صوبہ سندھ کی مجموعی آبادی کا تقریباً 37 فیصد بنتی ہے۔

 اسی تناسب کی بنیاد پر اپوزیشن جماعتوں، معاشی ماہرین اور شہری حلقوں کا دوٹوک مؤقف ہے کہ 720 ارب روپے کے سالانہ ترقیاتی پروگرام میں سے کم از کم 266 ارب روپے براہِ راست کراچی کی تعمیر و ترقی پر خرچ ہونے چاہییں۔

تاہم بجٹ دستاویزات کے جائزے سے یہ حقیقت سامنے آتی ہے کہ کراچی میگا پروجیکٹس کے مخصوص ہیڈ کے تحت محض 6 سے 6.5 ارب روپے کے قریب انتہائی قلیل رقم مختص کی گئی ہے۔

یہ بھی پڑھیں:کراچی میں ’کتا مار مہم‘ کی تشہیر پر اربوں روپے کے سرکاری فنڈز لُٹا دیے گئے، بلاول بھٹو  کی ’گڈ گورننس‘، سندھ حکومت کی ترجیحات کی قلعی کھل گئی

شہری حلقوں کا شکوہ ہے کہ ایک طرف شہر کے بڑے اور بنیادی ڈھانچے کے منصوبوں کو مکمل طور پر نظر انداز کیا گیا ہے، تو دوسری طرف اس معمولی مختص کردہ بجٹ کا حصہ بھی عملی طور پر شہر کو نہیں مل سکا۔

کراچی کا بجٹ کہاں جاتا ہے؟ شہریوں کو جواب کا انتظار

کراچی کے شہریوں کی بنیادی شکایت یہ ہے کہ ہر سال ترقیاتی منصوبوں کے اعلانات اور بجٹ میں خطیر رقوم مختص ہونے کے باوجود شہر کی حالت میں نمایاں بہتری دکھائی نہیں دیتی۔

سڑکوں کی تعمیر و مرمت، سیوریج لائنوں کی تبدیلی، برساتی نالوں کی صفائی، پینے کے صاف پانی کی فراہمی اور ٹریفک کے مسائل حل کرنے کے لیے مسلسل فنڈز مختص کیے جاتے ہیں، لیکن ان منصوبوں کے نتائج اکثر شہریوں کی توقعات کے مطابق سامنے نہیں آتے۔

یہی وجہ ہے کہ عوامی حلقوں میں ایک بنیادی سوال بار بار اٹھتا ہے کہ ترقیاتی بجٹ کی اصل رقم کہاں خرچ ہوتی ہے؟ کتنے فنڈز جاری کیے جاتے ہیں؟ کتنی رقم حقیقتاً خرچ ہوتی ہے اور کتنے منصوبے مقررہ مدت میں مکمل کیے جاتے ہیں؟

ان سوالات کے جوابات کے لیے منصوبہ وار اخراجات، فنڈز کے اجرا، تکمیل کی مدت اور آڈٹ رپورٹس کو عوام کے سامنے لانا ضروری ہے۔

تباہ حال انفراسٹرکچر اور شہریوں کی اذیت

بجٹ کی اس غیر منصفانہ تقسیم کے اثرات شہر کے گلی کوچوں میں واضح دکھائی دے رہے ہیں۔ کراچی کی مرکزی شاہراہیں اور رابطہ سڑکیں ٹوٹ پھوٹ کا شکار ہو چکی ہیں جبکہ اندرونی گلیاں کھنڈرات کا منظر پیش کر رہی ہیں۔

سڑکوں کی ابتر حالت کے باعث شہر بھر میں گھنٹوں ٹریفک جام رہنا روزمرہ کا معمول بن چکا ہے، جس سے شہریوں کا قیمتی وقت اور ایندھن ضائع ہو رہا ہے۔

علاوہ ازیں، شہر کا سیوریج اور نکاسی آب کا نظام مکمل طور پر مفلوج ہو کر رہ گیا ہے۔ صورتحال اس قدر ابتر ہے کہ معمولی سی بارش کے بعد بھی مصروف شاہراہیں اور رہائشی گلیاں جوہڑ اور تالاب کا منظر پیش کرنے لگتی ہیں، جس سے شہریوں کی آمدورفت معطل اور کاروباری زندگی مفلوج ہو جاتی ہے۔

پیپلز پارٹی کی مسلسل حکمرانی اور تباہ حال انفراسٹرکچر

پاکستان پیپلز پارٹی سندھ میں 17 سال کے طویل ترین عرصے سے برسراقتدار ہے۔ اس دوران صوبے کے مختلف شہروں میں ترقیاتی منصوبوں کے اعلانات اور تعمیراتی سرگرمیاں جاری رہی ہیں، لیکن کراچی جیسے بڑے شہر میں بنیادی شہری سہولتوں کی صورت حال بدستور ایک بڑا چیلنج ہے۔

مزید پڑھیں:ایرانی سپریم لیڈر کی شہادت کے باعث کراچی امریکی قونصل خانے میں پیش آنے والے واقعے پر سندھ حکومت کا گہرے دکھ اورافسوس کا اظہار

کراچی محض سندھ کا سب سے بڑا شہر نہیں بلکہ پاکستان کا معاشی مرکز بھی ہے۔ ملک کی صنعت، تجارت، بندرگاہوں، بینکاری اور کاروباری سرگرمیوں کا بڑا حصہ اسی شہر سے وابستہ ہے۔ ایسے میں شہر کے انفراسٹرکچر کو نظرانداز کرنے کے اثرات صرف کراچی تک محدود نہیں رہتے بلکہ ملکی معیشت بھی متاثر ہوتی ہے۔

مالیاتی اختیارات کی کشمکش

پاکستان پیپلز پارٹی گزشتہ ڈیڑھ دہائی سے زیادہ عرصے سے صوبہ سندھ میں برسرِ اقتدار ہے، اور اس تمام عرصے میں صوبائی حکومت اور کراچی کے مقامی نمائندوں کے درمیان وسائل کی تقسیم اور بلدیاتی اختیارات کے حوالے سے شدید کشمکش جاری رہی ہے۔

ملک کے مجموعی محصولات اور برآمدات میں سب سے بڑا حصہ ڈالنے کے باوجود کراچی میں ماس ٹرانزٹ، پینے کے صاف پانی کی فراہمی (کے فور منصوبہ) اور سالڈ ویسٹ مینجمنٹ جیسے بنیادی مسائل دہائیوں گزرنے کے بعد بھی حل طلب ہیں۔

شہریوں کا یہ بنیادی سوال آج بھی جواب طلب ہے کہ کاغذوں میں ظاہر کیے جانے والے اربوں روپے کے ترقیاتی فنڈز آخر کہاں جاتے ہیں اور کن منصوبوں پر خرچ ہوتے ہیں۔

یہ بھی پڑھیں:عمران خان کا رویہ ملکی سیاست کیلئے مشکلات کا سبب، سندھ حکومت سے شکایت نہیں، رانا ثناء اللہ

کسی بھی ملک کے معاشی انجن کو ترقیاتی فنڈز سے محروم رکھنا محض ایک شہر کا نقصان نہیں بلکہ پورے ملکی معاشی استحکام کو داؤ پر لگانے کے مترادف ہے۔

جب 37 فیصد آبادی کو اس کے جائز مالی حق کا محض ڈھائی فیصد حصہ بھی بمشکل ملے اور وہ بھی زمینی حقائق میں تبدیلی نہ لا سکے، تو اس سے شہریوں میں احساسِ محرومی اور بداعتمادی کا پیدا ہونا فطری امر ہے۔

صوبائی حکومت کو چاہیے کہ وہ روایتی بیانات کے بجائے ترقیاتی فنڈز کے استعمال کا شفاف آڈٹ عوام کے سامنے لائے اور کراچی کے انفراسٹرکچر کی بحالی کے لیے آبادی اور ریونیو جنریشن کے تناسب سے فوری اور ٹھوس فنڈز جاری کرے، بصورتِ دیگر شہری بحران مزید سنگین رخ اختیار کر سکتا ہے۔

Related Articles