کاروباری ہفتے کے تیسرے روزانٹربینک مارکیٹ میں ڈالر کی قیمت میں کمی ریکارڈ کی گئی۔ دوسری جانب سونا 1400 روپے مہنگا ہو گیا۔
اسٹیٹ بینک کی جانب سے جاری اعداد و شمار کے مطابق انٹربینک میں بدھ کو کاروبار کے اختتام پر ڈالر کی قیمت میں 8 پیسے کی معمولی کمی ہوئی ، جس کے بعد ڈالر 277 روپے 93 پیسے سے کم ہو کر 277 روپے 85 پیسے کا ہو گیا ہے ۔
کاروبار کے آغاز پر انٹربینک امریکی کرنسی 3 پیسے کی معمولی کمی کے بعد 277 روپے 90 پیسے پر ٹریڈ کر رہی تھی ۔ گزشتہ روز امریکی کرنسی معمولی اضافے کے بعد 277 روپے 93 پیسے پر بند ہو ئی تھی۔
اوپن مارکیٹ میں امریکی ڈالر کی قیمت خرید 277 روپے 90 پیسے جبکہ قیمت فروخت 279.40 روپے رہی ۔ اسطرح بڑی کرنسیوں میں یورو قیمت فروخت 295.60 روپے اور برطانوی پاؤنڈ 354.95 روپے کا ہو گیا ۔ خلیجی کرنسیوں میں سعودی ریال 74.20 روپے، یو اے ای درہم 76.00 روپے کا ہوگیا۔
دوسری جانب عالمی مارکیٹ میں سونے کی فی تولہ قیمت میں 1400 روپے کا اضافہ ریکارڈ کیا گیا جس کے بعد فی تولہ سونے کی قیمت 2 لاکھ 71 ہزار 900 روپے ہوگئی۔ آل پاکستان جیمز اینڈ جیولرز ایسوسی ایشن کے مطابق ملک بھر میں سونے کی فی تولہ قیمت 1400 روپے اضافے سے 278800 روپے ہوگئی۔
ایسوسی ایشن کا کہنا ہے کہ 10 گرام سونے کی قیمت 1200 روپے اضافے کے بعد 2 لاکھ 33 ہزار 111 روپے سے زائد ہوگئی۔ دریں اثنا بدھ کے روز سونے کی بین الاقوامی قیمت میں اضافہ ہوا۔ اے پی جی جے ایس اے کے مطابق قیمت 2,607 ڈالر فی اونس (20 ڈالر کے پریمیم کے ساتھ) تھی اور دن کے دوران اس میں 14 ڈالر کا اضافہ ہوا۔
حالیہ ہفتوں میں سونے کی قیمتیں ریکارڈ سطح پر پہنچ گئی ہیں، جس کی وجہ مشرق وسطیٰ میں بڑھتی ہوئی کشیدگی اور آئندہ امریکی انتخابات کے بارے میں غیر یقینی صورتحال ہے، جن دونوں نے محفوظ پناہ گاہوں کے اثاثوں کی مانگ میں اضافہ کیا ہے۔
علاوہ ازیں پاکستان اسٹاک ایکسچینج (پی ایس ایکس) میں کاروبار کا آغاز 93 ہزار 224.56 پوائنٹس کی سطح پر ہوا تاہم مارکیٹ کھلنے کے کچھ ہی دیر بعد 280 پوائنٹس کی کمی کے ساتھ ابتدائی نقصان کا سامنا کرنا پڑا۔
صبح 11 بجے تک بینچ مارک کے ایس ای 100 انڈیکس 92 ہزار 943.07 پوائنٹس کی کم ترین سطح پر آگیا تھا۔
تاہم سہ پہر کے وقت مارکیٹ نے اپنا رخ تبدیل کیا اور دوپہر تک 560 پوائنٹس کے اضافے سے 93 ہزار 786.39 پوائنٹس کی سطح پر پہنچ گیا۔ حالیہ سیشنز میں سٹاک مارکیٹ میں تیزی آئی ہے اور معاشی اشاریوں میں بہتری کی وجہ سے یہ تاریخی بلند ترین سطح پر پہنچ گئی ہے۔
تجزیہ کاروں نے اس تیزی کے رجحان کو کئی عوامل سے منسوب کیا ہے، جن میں ایم ایس سی آئی کی جانب سے مزید پاکستانی کمپنیوں کو فرنٹیئر مارکیٹس انڈیکس میں شامل کرنے کے فیصلے کے بعد غیر ملکی سرمایہ کاروں کے جذبات میں اضافہ بھی شامل ہے۔
