شدید سردی کی نئی لہر، کئی مقامات پر درجہ حرارت نقطۂ انجماد سے نیچے گر گیا، شہریوں کے لیے انتباہ

بلوچستان گزشتہ چند روز سے شدید سردی کی لپیٹ میں ہے اور بالخصوص صوبائی دارالحکومت کوئٹہ سمیت متعدد اضلاع میں درجہ حرارت نقطۂ انجماد تک جا پہنچا ہے۔

محکمۂ موسمیات کے مطابق کوئٹہ میں کم سے کم درجہ حرارت صفر ڈگری سینٹی گریڈ ریکارڈ کیا گیا جبکہ قلات میں پارہ منفی 2 ڈگری تک گر گیا۔ اس کے علاوہ زیارت میں بھی درجہ حرارت منفی 2، ژوب میں 3، سبی میں 9، تربت میں 14، نوکنڈی میں 9 اور چمن میں 4 ڈگری سینٹی گریڈ ریکارڈ کیا گیا۔

یہ بھی پڑھیں:آئندہ 24 گھنٹے موسم کیسا رہے گا؟ محکمہ موسمیات کی تازہ پیشگوئی

محکمۂ موسمیات نے تازہ موسمی پیشگوئی جاری کرتے ہوئے بتایا ہے کہ آئندہ 24 گھنٹوں کے دوران بلوچستان کے بیشتر علاقے خشک اور شدید سرد موسم کی لپیٹ میں رہیں گے۔ شمالی اضلاع میں صبح اور رات کے اوقات میں ’انتہائی سردی‘ کا سلسلہ برقرار رہنے کا امکان ظاہر کیا گیا ہے۔

رپورٹ کے مطابق کوئٹہ سمیت شمال مغربی اضلاع میں مطلع ’ابر آلود‘ رہنے کی توقع ہے، جبکہ کوئٹہ، زیارت، چمن، پشین، قلعہ عبداللہ، قلعہ سیف اللہ اور قریبی علاقوں میں چند مقامات پر ’ہلکی بارش‘ اور پہاڑوں پر ’ہلکی برفباری‘ بھی ہو سکتی ہے۔

ماہرین کے مطابق اگر موسم کی یہی صورتحال برقرار رہی تو صوبے کے پہاڑی علاقوں میں سردی کی شدت مزید بڑھ سکتی ہے جس سے سفری مشکلات میں اضافہ ہونے کا اندیشہ ہے۔ اس سلسلے میں مسافروں اور مقامی آبادی کو خصوصی احتیاط برتنے کی ہدایت کی گئی ہے۔ سرد علاقوں میں رہنے والے شہریوں کو مشورہ دیا گیا ہے کہ ’گرم لباس کا استعمال بڑھائیں‘ اور بچوں و بزرگوں کو سردی سے محفوظ رکھنے کے لیے اضافی احتیاط کریں۔

ادھر بلوچستان کے ساحلی علاقوں میں بھی موسم میں تبدیلی ریکارڈ کی گئی ہے جہاں گوادر میں کم سے کم درجہ حرارت 18 جبکہ جیوانی میں 12 ڈگری سینٹی گریڈ ریکارڈ کیا گیا۔ محکمۂ موسمیات کا کہنا ہے کہ کراچی میں بھی 8 دسمبر سے ’سرد ہواؤں‘ میں اضافہ ہوگا جس کے باعث خنکی میں مزید اضافہ دیکھا جا سکتا ہے۔

مزید پڑھیں:پاکستان بھر میں بارشیں، پہاڑوں پر برف باری کب شروع ہو رہی ہیں؟، محکمہ موسمیات کی تازہ پیش گوئی جاری

ملک کے دیگر بالائی علاقوں کے حوالے سے محکمۂ موسمیات نے بتایا ہے کہ گلگت بلتستان، کشمیر، شمالی بلوچستان اور بالائی خیبر پختونخوا میں مطلع ’جزوی ابر آلود‘ رہنے کا امکان ہے۔ دوسری جانب پنجاب اور خیبر پختونخوا کے میدانی علاقوں میں ’اسموگ‘ اور چند مقامات پر ’دھند‘ پڑنے کی پیشگوئی کی گئی ہے جس سے ٹریفک کی روانی متاثر ہونے کا خدشہ ہے۔

مزید سردی کی اس تازہ لہر کے پیش نظر محکمۂ موسمیات نے شہریوں کو موسم کی صورتحال سے باخبر رہنے اور احتیاطی تدابیر اختیار کرنے کی ایک بار پھر اپیل کی ہے۔