پاکستان اسٹاک ایکسچینج میں تاریخی تیزی

پاکستان اسٹاک ایکسچینج میں زبردست تیزی کا سلسلہ بدستور جاری ہے، جہاں کاروباری ہفتے کے پہلے روز 100 انڈیکس نے تاریخ کی نئی بلند ترین سطح کو چھو لیا۔

پیر کو کاروبار کے دوران مارکیٹ میں مثبت رجحان غالب رہا اور ایک موقع پر 100 انڈیکس ایک لاکھ 81 ہزار پوائنٹس کی نفسیاتی حد عبور کر گیا، جو اب تک کی ریکارڈ بلندی ہے۔

یہ بھی پڑھیں:نئے سال کا شاندارآغاز، پاکستان اسٹاک ایکسچینج میں نیا ریکارڈ قائم

کاروباری سیشن کے دوران سرمایہ کاروں کی بھرپور دلچسپی دیکھنے میں آئی، جس کے باعث مختلف شعبوں میں خریداری کا رجحان نمایاں رہا۔ اس وقت پاکستان اسٹاک ایکسچینج کا 100 انڈیکس 2100 پوائنٹس اضافے کے ساتھ ایک لاکھ 81 ہزار 135 پوائنٹس پر ٹریڈ کر رہا ہے، جو مارکیٹ میں مضبوط اعتماد کا اظہار ہے۔

مارکیٹ ذرائع کے مطابق بینکاری، توانائی، سیمنٹ اور آئل اینڈ گیس سیکٹرز میں خریداری نے انڈیکس کو نئی بلندیوں تک پہنچانے میں اہم کردار ادا کیا۔ سرمایہ کاروں کا کہنا ہے کہ معاشی استحکام کے حوالے سے مثبت توقعات، شرح سود میں ممکنہ کمی اور آئی ایم ایف پروگرام سے جڑی پیش رفت نے مارکیٹ کے اعتماد کو مزید تقویت دی ہے۔

واضح رہے کہ گزشتہ کاروباری ہفتے کے آخری روز بھی پاکستان اسٹاک ایکسچینج میں شاندار تیزی دیکھی گئی تھی، جب 100 انڈیکس میں 2600 پوائنٹس سے زائد کا اضافہ ہوا تھا اور انڈیکس ایک لاکھ 79 ہزار 34 پوائنٹس پر بند ہوا تھا۔ مسلسل دوسرے ہفتے مارکیٹ میں یہ مضبوط رجحان سرمایہ کاروں کے بڑھتے ہوئے اعتماد کی عکاسی کرتا ہے۔

مزید پڑھیں:پاکستان اسٹاک ایکسچینج میں مثبت رجحان، پاکستانی روپے کی اڑان، ڈالر مزید سستا ہوگیا

تجزیہ کاروں کے مطابق اگر موجودہ معاشی اور مالیاتی اشاریے اسی طرح مثبت رہے تو آئندہ دنوں میں بھی اسٹاک مارکیٹ میں تیزی کا رجحان برقرار رہنے کا امکان ہے، تاہم سرمایہ کاروں کو محتاط حکمت عملی اختیار کرنے کا مشورہ بھی دیا جا رہا ہے۔