پی ٹی آئی  نےہمیشہ پرتشدد مظاہرے کیے،اسلام آباد میں احتجاج نہیں ہونے دیں گے،عطا تارڑ

وفاقی وزیر اطلاعات عطا تارڑ نے کہا ہے کہ اسلام آباد میں احتجاج کے حوالے سے حکومت کی پالیسی واضح ہے اور کسی بھی صورت احتجاج کی اجازت نہیں دی جائے گی، ان کا کہنا تھا کہ احتجاج سے متعلق عدالتی فیصلہ موجود ہے اور اس پر عمل درآمد کیا جائے گا۔

ایک ٹی وی پروگرام میں گفتگو کرتے ہوئے عطا تارڑ نے کہا کہ اسلام آباد میں کسی بھی مقام پر احتجاج کی اجازت نہیں دی جائے گی، احتجاج کے معاملے پر حکومت کسی قسم کی نرمی کا ارادہ نہیں رکھتی اور کسی دباؤ کے تحت مطالبات تسلیم نہیں کیے جائیں گے۔

پی ٹی آئی پر تنقید

وفاقی وزیر اطلاعات نے تحریک انصاف کے احتجاجی طریقہ کار پر تنقید کرتے ہوئےکہا کہ پارٹی نے ماضی میں پرتشدد مظاہرے کیے،ان کا کہنا تھا کہ احتجاج سے متعلق عدالت کا فیصلہ بھی آچکا ہے اور اس کا حکم واضح ہے، اس لیے حکومت اسی قانونی مؤقف کے مطابق کارروائی کرے گی۔

قانون سب کے لیے برابر

عطا تارڑ نے کہا کہ اپوزیشن رہنماؤں کے ساتھ ملاقاتیں ہوتی رہتی ہیں، تاہم قانون سب کے لیے یکساں ہے،سیاسی رہنماؤں سے رابطوں کا مطلب یہ نہیں کہ قانون کی خلاف ورزی کی اجازت دی جائے گی،انہوں نے واضح کیا کہ اسلام آباد میں تحریک انصاف کے احتجاج کی اجازت نہیں دی جائے گی اور خلاف ورزی کی صورت میں قانون اپنا راستہ اختیار کرے گا۔

یہ بھی پڑھیں :پی ٹی آئی لانگ مارچ، پولیس اہلکاروں کو شرکت سے روک دیا گیا، کارروائی ہوگی،آئی جی کا مراسلہ

خیبرپختونخوا کی صورتحال

وفاقی وزیر نے خیبرپختونخوا کی امن و امان کی صورتحال پر بھی گفتگو کی، ان کا کہنا تھا کہ کوہاٹ میں لاشیں پڑی ہیں جبکہ صوبے کی حکومت کی جانب سے  توجہ نہیں دی جارہی،عطا تارڑ نے کہا کہ صوبے میں امن و امان قائم کرنا خیبرپختونخوا حکومت کی ذمہ داری ہے اور صوبائی حکومت کو اپنی ذمہ داریاں پوری کرنی چاہئیں۔

جماعت اسلامی سے متعلق گفتگو

جماعت اسلامی اور تحریک انصاف کے ممکنہ سیاسی تعاون کے حوالے سے سوال پر عطا تارڑ نے دونوں جماعتوں کے احتجاجی طریقہ کار میں فرق کا ذکر کیا،ان کا کہنا تھا کہ تحریک انصاف کے احتجاج میں توڑ پھوڑ کے واقعات سامنے آتے رہے ہیں، جبکہ جماعت اسلامی کے کارکن پرامن رہتے ہیں،انہوں نے کہا کہ دونوں جماعتوں کا سیاسی اور احتجاجی انداز مختلف ہے، اس لیے انہیں ایک ساتھ آتا ہوا دیکھنا مشکل نظر آتا ہے۔

جماعت اسلامی کو بھی تنبیہ

عطا تارڑ نے جماعت اسلامی کے حوالے سے بھی کہا کہ بہتر ہوگا کہ وہ اسلام آباد نہ آئے، کیونکہ قانون کی خلاف ورزی کی صورت میں قانون اپنا راستہ اختیار کرے گا،وفاقی وزیر اطلاعات نے ایک بار پھر واضح کیا کہ حکومت اسلام آباد میں احتجاج کے معاملے پر اپنے مؤقف سے پیچھے نہیں ہٹے گی اور عدالتی احکامات کی روشنی میں اقدامات کیے جائیں گے۔