عالمی کراس بارڈر ادائیگیوں کے پلیٹ فارم سن ریٹ نے 12 اگست 2026 کو لاہور میں ایک اعلیٰ سطح کی تقریب کا اہتمام کرکے پاکستان میں اپنی خدمات کا باضابطہ آغاز کر دیا ہے۔
’آن دی فرنٹ فٹ، پاکستان‘ کے عنوان سے منعقدہ اس تقریب کا انعقاد یوم آزادی سے 2 روز قبل کیا گیا، جس میں مالیاتی شعبے کے سربراہان، بینکرز اور صنعت کے رہنماؤں نے پاکستانی کاروباریوں کے لیے کراس بارڈر ادائیگیوں کے بنیادی ڈھانچے پر تفصیلی گفتگو کی۔
خاموش آپریشن کے بعد باضابطہ آغاز
سن ریٹ گزشتہ کچھ عرصے سے پاکستان میں خاموشی سے کام کر رہا تھا اور ان کاروباریوں کو خدمات فراہم کر رہا تھا جنہیں بین الاقوامی ادائیگیاں وصول کرنے کے لیے تیز اور قابل اعتماد طریقوں کی ضرورت تھی۔
لاہور میں ہونے والی اس تقریب نے کمپنی کے مارکیٹ میں باضابطہ داخلے کو نشان زد کیا اور ان شراکت داروں اور کلائنٹس کو خراج تحسین پیش کیا گیا جنہوں نے اس ابتدائی ترقی میں تعاون کیا ۔
بانی کا پاکستان کا دورہ اور بینکنگ پینل
سن ریٹ کے شریک بانی جوشوا باؤ نے اس تقریب میں شرکت کے لیے خصوصی طور پر لاہور کا دورہ کیا اور اس موقع پر خطاب کرتے ہوئے بتایا کہ کس طرح عالمی ادائیگیوں کا بنیادی ڈھانچہ پاکستانی کاروباریوں کو بین الاقوامی سطح پر ترقی کرنے میں مددگار ثابت ہو سکتا ہے۔
تقریب کے دوران ایک بینکنگ پینل کا بھی اہتمام کیا گیا جس میں پاکستان کے مالیاتی شعبے کے رہنماوں نے شرکت کی، جبکہ مصنوعی ذہانت (اے آئی) کے بارے میں بھی گفتگو کی گئی کہ یہ ٹیکنالوجی پاکستانی کاروباریوں کے عالمی منڈیوں تک رسائی کے طریقے کو کس طرح تبدیل کر رہی ہے ۔
ہدف صارفین اور سہولیات
یہ پلیٹ فارم خاص طور پر ان کاروباریوں کے لیے ڈیزائن کیا گیا ہے جو سرحدوں کے پار آمدنی کماتے ہیں، بشمول آئی ٹی اور سافٹ ویئر کمپنیاں جو بین الاقوامی کلائنٹس کو بل کرتی ہیں، فری لانسرز اور ایجنسیاں جو اپ ورک جیسے پلیٹ فارمز پر کام کرتی ہیں
اسی طرح ای کامرس سیلرز جو عالمی مارکیٹ پلیسز پر فروخت کرتے ہیں، ڈیجیٹل مارکیٹنگ ایجنسیاں جو بیرون ملک بلنگ اور ملٹی کرنسی اکاؤنٹس کا انتظام کرتی ہیں
سن ریٹ اپنی خدمات کو تیز تر ادائیگیوں، مسابقتی زر مبادلہ کی شرحوں اور براہ راست مقامی سپورٹ کے گرد مرکوز کرتا ہے، بجائے اس کے کہ صارفین کو خودکار سسٹمز کے ذریعے روٹ کیا جائے۔
یہ پلیٹ فارم 190 سے زائد ممالک میں 130 سے زیادہ کرنسیوں کو سپورٹ کرتا ہے اور ویزا اور ماسٹر کارڈ کا پرنسپل ممبر ہے، جسے عالمی ادائیگیوں میں ایک دہائی سے زائد کا تجربہ حاصل ہے ۔
اسٹریٹجک شراکتیں اور مستقبل کے امکانات
سن ریٹ نے پاکستان میں اسٹریٹجک شراکت داریوں کے ذریعے اپنی موجودگی مضبوط کی ہے۔ اس سے قبل اسکری بینک کے ساتھ ایک معاہدے پر دستخط کیے گئے تھے جس کا مقصد پاکستان میں عالمی ادائیگیوں کی خدمات کو بڑھانا ہے۔
اس شراکت کا مقصد پاکستانی کاروباریوں، فری لانسرز اور چھوٹے اور درمیانے درجے کے کاروباری اداروں (ایس ایم ایز) کو بین الاقوامی کلائنٹس سے آسانی، رفتار اور اعتماد کے ساتھ ادائیگیاں وصول کرنے کے قابل بنانا ہے ۔
تقریب کے شرکا کو سن ریٹ کی پاکستان ٹیم سے براہ راست رابطہ قائم کرنے کا موقع بھی ملا، جس سے کاروباریوں کو جاری سپورٹ کے لیے ایک مقامی رابطہ فراہم ہو سکے گا ۔
ماہرین کا تجزیہ
ماہرین کے مطابق پاکستان میں ڈیجیٹل معیشت تیزی سے ترقی کر رہی ہے اور فری لانسنگ، آئی ٹی برآمدات اور ای کامرس جیسے شعبوں میں اضافہ ہو رہا ہے۔ اس تناظر میں سن ریٹ کا باضابطہ آغاز پاکستان کے ڈیجیٹل کاروباری ماحولیات کے لیے ایک اہم سنگ میل ہے ۔
سن ریٹ کی آمد سے پاکستانی فری لانسرز اور آئی ٹی کمپنیوں کو بین الاقوامی ادائیگیوں کے حصول میں درپیش مشکلات کم ہو سکتی ہیں۔
تیز تر ادائیگیوں، بہتر زر مبادلہ کی شرحوں اور مقامی سپورٹ کے ساتھ، یہ پلیٹ فارم پاکستان کی ڈیجیٹل معیشت کو فروغ دینے میں اہم کردار ادا کر سکتا ہے ۔
اسکری بینک کے ساتھ شراکت داری سے پاکستان میں ریمٹنس سروسز میں بہتری کی توقع ہے، جس سے ملک کی زرمبادلہ کی ذخائر میں اضافہ ہو سکتا ہے اور موجودہ اکاؤنٹ خسارہ کم ہو سکتا ہے ۔
