شارجہ میں خطرناک ڈرائیونگ مہنگی پڑ گئی، لگژری گاڑیاں ضبط

شارجہ پولیس نے خطرناک انداز میں گاڑیاں چلانے اور سڑکوں پر ریس لگانے کے الزام میں دو افراد کو گرفتار کر لیا، جبکہ ان کی قیمتی گاڑیاں بھی ضبط کر لی گئیں۔

پولیس کے مطابق دونوں ڈرائیوروں نے ٹریفک قوانین کی سنگین خلاف ورزی کرتے ہوئے نہ صرف اپنی جان بلکہ دیگر شہریوں کی زندگیوں کو بھی خطرے میں ڈالا۔

 یہ بھی پڑھیں :شارجہ سے کراچی آنے والے نجی طیارہ حادثے کی تفصیلات جاری

حکام کا کہنا ہے کہ ایک ملزم نے اپنی خطرناک ڈرائیونگ کی ویڈیوز سوشل میڈیا پر بھی شیئر کیں جس کے بعد پولیس نے واقعے کا نوٹس لیتے ہوئے تحقیقات کا آغاز کیا۔

پولیس نے سوشل میڈیا پر موجود ویڈیوز اور دیگر شواہد کی مدد سے دونوں ڈرائیوروں کی شناخت کی اور انہیں گرفتار کر لیا۔ کارروائی کے دوران دونوں گاڑیاں بھی تحویل میں لے لی گئیں۔

شارجہ پولیس نے بتایا کہ دونوں ملزمان کو مزید قانونی کارروائی کے لیے پبلک پراسیکیوشن کے حوالے کر دیا گیا ہے۔

 یہ بھی پڑھیں :پاکستانیوں کے لیے خوشخبری، دبئی نے ویزا پالیسی میں بڑی نرمی کردی

پولیس نے شہریوں کو خبردار کرتے ہوئے کہا کہ سڑکیں ریس لگانے کے لیے نہیں ہیں اور نہ ہی خطرناک ڈرائیونگ کی ویڈیوز سوشل میڈیا پر شیئر کرنے کی اجازت ہے۔

ایسے اقدامات کرنے والوں کے خلاف قانون کے مطابق سخت کارروائی کی جائے گی۔