آسٹریلوی تھنک ٹینک لووی انسٹی ٹیوٹ اور ہمراہ نیٹ ورک کی تازہ رپورٹس کے مطابق افغان طالبان نے تعلیمی نظام کو عسکری و انتہا پسندانہ نظریات پر ڈھالنا شروع کر دیا ہے۔
ملک بھر میں رجسٹرڈ مدارس کی تعداد 23 ہزار تک جا پہنچی ہے جن میں 36 لاکھ سے زائد بچے زیرِ تعلیم ہیں، جو خطے کے امن کے لیے ایک بڑا سوالیہ نشان ہے۔
مدارس کے پھیلاؤ اور نئے نصاب کی حقیقت
افغانستان میں طالبان کے برسرِ اقتدار آنے کے بعد سے تعلیمی ڈھانچے میں انقلابی مگر خطرناک تبدیلیاں لائی گئی ہیں۔
یہ بھی پڑھیں:افغانستان: بدخشان میں طالبان اور افغان یونائیٹڈ فرنٹ کے درمیان جھڑپیں، ہلاک اور زخمی ہونے والے طالبان کی ہیلی کاپٹر سے منتقلی کی ویڈیو سامنے آگئی
رپورٹ کے مطابق ملک میں رجسٹرڈ مدارس کی تعداد جو پہلے صرف 5 ہزار تھی، اب بڑھ کر 23 ہزار ہو چکی ہے جہاں 36 لاکھ سے زیادہ کم عمر بچے تعلیم حاصل کر رہے ہیں۔
ان اداروں میں روایتی اور جدید علوم کے بجائے طالبان کی نظریاتی سوچ، عسکری نظریات اور جہادی نصاب کو بنیادی حیثیت دی جا رہی ہے۔ اس نظام کا مقصد بچوں میں آزادانہ سوچ کو ختم کرکے حکومت سے مکمل وفاداری اور اندھی اطاعت پیدا کرنا ہے۔
خودکش حملہ آوروں کی تشہیر اور نظریاتی تربیت
افغان طالبان کی جانب سے مذہبی تعلیم اور عسکریت پسندی کے درمیان حائل لکیر کو بالکل مٹا دیا گیا ہے۔ بچوں کو نصاب کے ذریعے اس طرح تیار کیا جا رہا ہے کہ وہ عسکری کارروائیوں کو معمول سمجھیں۔
خودکش حملہ آور دستوں کی مسلسل تشہیر اور اس کی تحسین نئی نسل کے ذہنوں میں زہر گھول رہی ہے۔
عالمی ماہرین کا کہنا ہے کہ اگر مستقبل میں لڑکیوں کو اسکولوں میں واپس جانے کی اجازت مل بھی جائے، تب بھی یہ بدلا ہوا تعلیمی منظرنامہ اور نظریاتی بگاڑ ٹھیک نہیں ہو سکے گا، کیونکہ طالبان پوری نسل کی سوچ کو اپنی مرضی کے مطابق مفلوج کر چکے ہیں۔
علاقائی سلامتی کے خدشات
تاریخی تناظر میں دیکھا جائے تو افغانستان طویل عرصے سے خانہ جنگی اور غیر ملکی مداخلت کا شکار رہا ہے، مگر موجودہ دور میں تعلیمی اداروں کو براہ راست نظریاتی جنگ کا ہتھیار بنایا جانا ایک نیا اور خطرناک موڑ ہے۔
مزید پڑھیں:کنڑ میں تعلیمی ادارے پر حملے کے دعوے بے بنیاد قرار، وزارت اطلاعات نے افغان و بھارتی میڈیا کا پروپیگنڈا بے نقاب کردیا
افغانستان کی سرزمین پر القاعدہ سمیت متعدد کالعدم عسکریت پسند تنظیموں کی موجودگی اس بات کی غمازی کرتی ہے کہ یہ نظریاتی منصوبے صرف اندرونی معاملات تک محدود نہیں ہیں۔
پاکستان سمیت تمام پڑوسی ملک طویل عرصے سے یہ مؤقف اختیار کرتے آئے ہیں کہ افغان سرزمین پر دہشت گردی کے جو محفوظ ٹھکانے اور فکری مراکز پنپ رہے ہیں، وہ پورے خطے کے امن کے لیے ایک بم شیل کی حیثیت رکھتے ہیں۔
خطے کے امن کے لیے ایک خاموش طوفان
افغان تعلیمی نظام میں ہونے والی یہ تبدیلیاں محض داخلی پالیسی کا معاملہ نہیں ہیں، بلکہ یہ پوری دنیا اور بالخصوص جنوبی ایشیا کے امن کے لیے ایک دہکتا ہوا بارود ہیں۔
جب لاکھوں بچوں کو ابتدائی عمر سے ہی عسکریت پسندی، انتہا پسندی اور عسکری اطاعت کے درس دیے جائیں گے، تو اس کا نتیجہ ایک ایسی مسلح نسل کی شکل میں نکلے گا جو بات چیت کے بجائے بندوق کی زبان سمجھے گی۔
اس سے نہ صرف اندرونِ افغانستان انسانی حقوق اور روشن خیالی کا جنازہ نکل رہا ہے، بلکہ یہ پالیسی پاکستان کے اس اصولی مؤقف کو سو فیصد سچ ثابت کرتی ہے کہ افغان سرزمین سے دہشتگردی کا خطرہ بدستور موجود ہے اور آنے والے وقتوں میں اس کے اثرات پوری دنیا کو بھگتنا پڑیں گے۔
