خلیج میں امن اور دفاع کے لیے ترکیہ قطر ایک ساتھ،اردوان نے بڑا اعلان کردیا

 ترکیہ اور قطر نے دوطرفہ تعلقات کو مزید وسعت دینے کے لیے دفاع سمیت متعدد اہم شعبوں میں تعاون کے معاہدوں پر دستخط کر دیے ہیں۔ دونوں ممالک نے دفاعی شراکت داری کے ساتھ تجارت، تعلیم، توانائی، امن کے قیام اور بین الاقوامی تنازعات کے سفارتی حل کے لیے بھی مل کر کام کرنے پر اتفاق کیا ہے۔

ترک خبر ایجنسی کے مطابق یہ معاہدے استنبول میں ترکیہ اور قطر کی اعلیٰ سطحی اسٹریٹجک کمیٹی کے 12ویں اجلاس کے دوران طے پائے۔ اس موقع پر ترک صدر رجب طیب اردوان اور امیر قطر شیخ تمیم بن حمد الثانی بھی موجود تھے۔

دونوں رہنماؤں کی موجودگی میں صدارتی دفتر میں منعقدہ تقریب کے دوران باہمی دفاعی معاہدے پر دستخط کیے گئے۔ اس سے قبل دونوں ممالک کے وفود نے دوطرفہ تعلقات اور مختلف شعبوں میں تعاون کے امکانات پر مذاکرات کیے۔

دفاعی تعاون میں توسیع

معاہدے پر ترک صدر رجب طیب اردوان اور امیر قطر شیخ تمیم بن حمد الثانی نے دستخط کیے۔ اس پیش رفت کو دونوں ممالک کے درمیان دفاعی تعلقات کو مزید مستحکم کرنے کی کوششوں کا حصہ قرار دیا جا رہا ہے۔

 یہ بھی پڑھیں :ایران امریکا کشیدگی کا واحد حل سفارتکاری ہے،ترکیہ کے صدر اردوان کا ٹرمپ سے رابطہ،مذاکرات پر زور

ترک صدر نے کہا کہ دفاعی معاہدے سے ترکیہ اور قطر کے دوطرفہ تعلقات میں تعاون کے نئے پہلو سامنے آئیں گے۔ انہوں نے دفاعی صنعت میں شراکت داری کو مزید وسعت دینے کے عزم کا بھی اظہار کیا۔

تجارت اور تعلیم کے معاہدے

دفاعی معاہدے کے علاوہ دونوں ممالک نے صارفین کے تحفظ، مارکیٹ کی نگرانی اور مصنوعات کے معائنے سے متعلق مفاہمتی یادداشت پر بھی دستخط کیے۔

اس معاہدے پر ترکیہ کے وزیر تجارت اور قطر کے متعلقہ وزیر نے دستخط کیے۔ اس کا مقصد دونوں ملکوں کے درمیان تجارتی روابط اور متعلقہ اداروں کے تعاون کو فروغ دینا ہے۔

تعلیم کے شعبے میں بھی باہمی تعاون کے معاہدے پر دستخط کیے گئے۔ ترکیہ کی جانب سے وزیر تعلیم یوسف تیکن اور قطر کی طرف سے محمد بن عبدالعزیز الخلیفی نے اس معاہدے پر دستخط کیے۔

امن اور تنازعات کے حل میں مشترکہ کوششیں

ترکیہ اور قطر نے امن کے قیام، ثالثی اور تنازعات کے سفارتی حل کے لیے بھی تعاون بڑھانے پر اتفاق کیا۔

اس سلسلے میں ترک وزیر خارجہ ہاکان فیدان اور قطر کے وزیراعظم و وزیر خارجہ شیخ محمد بن عبدالرحمان الثانی نے مفاہمتی یادداشت پر دستخط کیے۔

دونوں وزرائے خارجہ نے اسٹریٹجک کمیٹی کے 12ویں اجلاس کے مشترکہ اعلامیے پر بھی دستخط کیے، جس میں دوطرفہ تعاون کے مختلف پہلوؤں کا احاطہ کیا گیا۔

خلیج میں جنگ روکنے کے لیے سفارت کاری پر زور

اجلاس سے خطاب کرتے ہوئے ترک صدر رجب طیب اردوان نے کہا کہ ترکیہ اور قطر خلیج میں جنگ کے امکانات کو روکنے، مذاکرات کے لیے سازگار ماحول پیدا کرنے اور خطے میں امن کے قیام کے لیے مشترکہ کوششیں جاری رکھیں گے۔

انہوں نے تنازعات میں شامل فریقین کو اپنے اختلافات سفارت کاری کے ذریعے حل کرنے پر آمادہ کرنے کی اہمیت پر بھی زور دیا۔

 یہ بھی پڑھیں :سعودی وزیر خارجہ کے قطر اور مصر کے ہم منصبوں سے رابطے، علاقائی صورتحال پر تبادلہ خیال

ترک صدر اور امیر قطر نے ملاقات کے دوران دوطرفہ تعلقات کے علاوہ عالمی سطح پر ہونے والی اہم پیش رفت پر بھی تبادلہ خیال کیا۔

توانائی اور اقتصادی شراکت داری بھی ایجنڈے میں شامل

صدر اردوان نے کہا کہ ترکیہ اور قطر توانائی کے شعبے میں تعاون کو فروغ دینے اور اس میں تنوع پیدا کرنے کے لیے کام کر رہے ہیں۔

ان کے مطابق دونوں ممالک کے درمیان تجارتی اور اقتصادی شراکت داری کا معاہدہ بھی باہمی تجارتی اہداف کے حصول میں مددگار ثابت ہوگا۔ اس معاہدے پر گزشتہ برس دستخط کیے گئے تھے۔

انہوں نے دفاعی صنعت میں تعاون کو مزید وسعت دینے کے عزم کا اعادہ کرتے ہوئے کہا کہ ترکیہ اور قطر مختلف شعبوں میں اپنی شراکت داری کو آگے بڑھاتے رہیں گے۔

 یہ بھی پڑھیں :پاکسان، قطر ثالثی کی بڑی کامیابی،ایران امریکہ مذاکرت آج دوحہ میں متوقع،عرب میڈیا کا دعوی

دونوں ممالک کے درمیان ہونے والے حالیہ معاہدے دفاع، تجارت، تعلیم، توانائی اور سفارت کاری سمیت متعدد شعبوں میں تعلقات کو آگے بڑھانے کے لیے ایک مشترکہ فریم ورک فراہم کرتے ہیں۔