ترکیہ میں دل کو چھو لینے والا منظر، ترک پولیس نے ڈیڑھ گھنٹے بعد پاکستانی نوجوان کو خودکشی سے بچا لیا، افسر کے گلے لگانے پر نوجوان رو پڑا

ترکیہ کے شہر استنبول میں 15 جولائی شہدا پل پر اسرائیل مخالف احتجاج کے دوران خودکشی کی کوشش کرنے والے پاکستانی شہری کو ترک پولیس نے تقریباً ڈیڑھ گھنٹے کی کوششوں کے بعد بحفاظت نیچے اتار لیا۔ پولیس افسر کی جانب سے گلے لگائے جانے پر پاکستانی نوجوان آبدیدہ ہوگیا۔

ترک میڈیا کے مطابق 13 نومبر کی صبح تقریباً 10 بج کر 20 منٹ پر 30 سالہ پاکستانی شہری نے استنبول کے معروف 15 جولائی شہدا پل پر اپنی گاڑی روک کر احتجاج شروع کر دیا۔ نوجوان نے پاکستان اور ترکیہ کے پرچم اٹھا رکھے تھے، جبکہ وہ اسرائیل مخالف نعرے بھی لگا رہا تھا۔

رپورٹس کے مطابق پاکستانی شہری کی شناخت صرف ایم این (M.N.) کے ابتدائی حروف سے ظاہر کی گئی ہے اور اس کا مکمل نام جاری نہیں کیا گیا۔ احتجاج کے دوران نوجوان کے پاس پستول نما شے بھی موجود تھی، جس کے باعث پولیس نے فوری طور پر حفاظتی اقدامات کیے اور پل پر ٹریفک کی آمدورفت محدود کر دی۔

یہ بھی پڑھیں: مکہ معاہدہ ترکیہ اور سعودی عرب سے ہمارے اشتراک کی علامت ، امن و خوشحالی کیلئے سفارتکاری سے تنازعات حل کیے جائیں، اسحاق ڈار

واقعے کی اطلاع ملتے ہی ترک پولیس اور خصوصی دستے موقع پر پہنچ گئے۔ پولیس اہلکاروں نے نوجوان سے بات چیت شروع کی اور اسے اپنا احتجاج ختم کرکے محفوظ طریقے سے نیچے آنے پر آمادہ کرنے کی کوشش کی۔

تقریباً ڈیڑھ گھنٹے کی مسلسل بات چیت کے بعد پولیس اہلکار نوجوان کو قائل کرنے میں کامیاب ہوگئے۔ فراہم کردہ ویڈیو کی تفصیلات کے مطابق ایک ترک پولیس افسر نے نوجوان کو گلے لگایا تو وہ جذباتی ہوگیا اور رونے لگا۔ بعد ازاں پولیس نے اسے تحویل میں لے لیا اور پل پر ٹریفک بحال کر دی گئی۔

فراہم کردہ معلومات کے مطابق واقعے کی ابتدائی تحقیقات میں نوجوان کے بعض ذاتی اور نفسیاتی مسائل کا بھی ذکر سامنے آیا ہے۔ رپورٹس میں دعویٰ کیا گیا کہ وہ ماضی میں بھی دو مرتبہ خودکشی کی کوشش کر چکا تھا، جبکہ اس سے منسوب ایک تحریری نوٹ میں والد کی وفات کے بعد پیدا ہونے والی جذباتی کیفیت اور نفسیاتی علاج کا ذکر تھا۔

ترک میڈیا کے مطابق واقعے میں اسرائیل مخالف احتجاج کا پہلو بھی نمایاں رہا، تاہم نوجوان کے اس اقدام کے پس منظر میں ذاتی حالات بھی شامل ہونے کی اطلاعات ہیں۔ واقعے سے متعلق مزید تحقیقات جاری ہیں۔