پمز واقعہ، سعودی عرب کا پاکستان سے اظہار تعزیت

 نومولود بچوں کی ہلاکت پر سعودی وزارت خارجہ کا اظہار افسوس، مشکل گھڑی میں پاکستانی حکومت اور عوام سے یکجہتی کا اعلان کردیا ۔

اسلام آباد کے پمز اسپتال میں نومولود بچوں کی ہلاکت کے افسوسناک واقعے پر سعودی عرب نے پاکستان سے تعزیت اور گہرے دکھ کا اظہار کیا ہے۔

سعودی وزارت خارجہ کی جانب سے جاری بیان میں پمز اسپتال کی نرسری میں پیش آنے والے واقعے پر افسوس کا اظہار کرتے ہوئے متاثرہ خاندانوں سے ہمدردی کی گئی ہے۔

 یہ بھی پڑھیں :پمز ہسپتال میں ایک ماہ قبل بھی آتشزدگی کا واقعہ پیش آنے کا انکشاف، دستاویزات آزاد ڈیجیٹل نے حاصل کرلئے

سعودی وزارت خارجہ کا کہنا ہے کہ اس مشکل اور غم کی گھڑی میں سعودی عرب پاکستان کی حکومت اور عوام کے ساتھ کھڑا ہے اور پاکستانی عوام کے لیے امن، سلامتی اور استحکام کی دعا کرتا ہے۔

بیان میں مزید کہا گیا ہے کہ سعودی عرب اور پاکستان کے درمیان برادرانہ تعلقات قائم ہیں اور مشکل وقت میں دونوں ممالک ایک دوسرے کے ساتھ اظہار یکجہتی کرتے ہیں۔

یاد رہے کہ بدھ کی صبح اسلام آباد کے پمز اسپتال کے گائنی وارڈ کی نرسری میں اچانک آگ بھڑک اٹھی تھی جس کے نتیجے میں 14 نومولود بچے جاں بحق ہوگئے تھے۔

ریسکیو ذرائع کے مطابق نرسری میں صبح تقریباً 6 بج کر 45 منٹ پر آگ لگی۔ ابتدائی اطلاعات کے مطابق آگ ائیرکنڈیشنر کے کمپریسر میں خرابی کے باعث بھڑکی۔

اسپتال حکام کے مطابق واقعے کے وقت نرسری میں 15 نومولود بچے موجود تھے۔ آتشزدگی کے دوران ایک لیڈی ڈاکٹر ایک بچے کو محفوظ نکالنے میں کامیاب ہوگئی تاہم 14 نومولود بچوں کو نہ بچایا جاسکا۔

 یہ بھی پڑھیں :پمز اسپتال واقعہ پر وزیر اعظم نے اسلام آباد میں ہنگامی اجلاس طلب کر لیا

واقعے کے بعد جاں بحق بچوں کی میتیں ورثا کے حوالے کردی گئی تھیں۔ بعض لواحقین نے بچوں کی شناخت کے حوالے سے تحفظات کا اظہار کرتے ہوئے ڈی این اے ٹیسٹ کرانے کا مطالبہ بھی کیا ہے۔

سعودی عرب کی جانب سے تعزیت کا اظہار ایسے وقت سامنے آیا ہے جب متاثرہ خاندان اپنے بچوں کی ہلاکت پر شدید صدمے سے دوچار ہیں اور واقعے کی مکمل تحقیقات کا مطالبہ کررہے ہیں۔